Poezi nga Fatos Arapi
Të këndshëm promethejtë, të lezetshëm,-
gjysmëperëndira mbërrthyer ndër karrige,
ndër kolltuqe të zyrave, të veturave,-
mbërthyer gjysmëperënditë.
Ararati?- Gjëkundi…Gjëkundi shkëmbëguriçkë!
Ata me gisht të tregojnë Zeusin, Efestin.
T‘i shohësh promethejtë kur venë e vinë Tiranës:
madhështorë në vuajtje,
në heqje-sublimë.
Vetëm për ty vdesin në gjithë shekujt e shkuar,
në gjithë të ardhshmit, vetëm për mua lindin!
Popullorët,
të sfiliturit,- tej xhamave të veturave,
zhgabonjës i tregojnë mëlçitë.
Janë me të vërtetë të lezetshëm promethenjtë,
nga zjarret që u grabitën qiejve,
s ‘të japin asnjë kongjill.
ObserverKult
Lexo edhe:
FATOS ARAPI: DUKE SHKELUR NËPËR GUACA TË DETIT
Duke shkelur nëpër guaca të detit
ndjeva ditën e sotme, të çelë
nëpër trupin tim, si një gjethe dafine…
Fëshfërinte e gjelbër…. e gjelbër.
Dhe mendova:
nesër,
këto gurëza do t’i shoh ndryshe,
këto brigje të kohës së bardhë;
nesër,
fjoll’ e dridhshme, inkandeshente
e orbitave, që sapo feksën
nëpër qiej të virgjër të njerëzve,
do të lidhë ditët e mia,
porsi sot… edhe pakëz më ndryshe;
nesër,
dashurinë që drejt meje po vjen,
do ta puth në buzë, në ballë;
nëpër zëra të flokëve të saj
gishtërinjtë do përshkoj, do t’i them:
hyrë tek unë, pa frikë se një ditë
mund të vdesësh (si të tjerat?) edhe ti.
Dhe e vdekur atje, dashuri,
përjetësisht do të mbetesh e gjallë;
nesër,
ndryshe pyetjen e jetës: “Cili je?”
do dëgjoj edhe ndryshe pastaj
zërin tim: Unë jam…
Duke shkelur nëpër guaca të detit
ndjeva ditën e sotme, të çelë
nëpër trupin tim, si një gjethe dafine.
ObserverKult
