Edhe pse 90 vjeç, aktorja e madhe shqiptare Margarita Xhepa është ngjitur në skenën e teatrit “Fan Noli” në Ersekë, me shfaqjen “Këpucët e kuqe”.
Kjo vepër skenike e cila në fokusin e saj kishte gratë e keqtrajtuara, ka emocionuar publikun artdashës kolonjar. I cili si rrallë herë, ka mbushur plot teatrin e qytetit.
Xhepa, Nderi i Kombit ka treguar për emocionet pas shfaqjes.
“Me një mesazh, të kohës, të fuqishëm që edukon dhe fisnikëron. Për gratë në radhë të parë se gruaja është e bekuar nga Perëndia”, tha Xhepa.
Arta Dade, ka hequr petkun e politikanes dhe i është bashkuar kësaj shfaqjeje. Për të dhënë mesazhin e rëndësishëm për mbrojtjen e grave.
“Ne erdhëm në Ersekë për të dhënë një mesazh për gratë e mrekullueshme të Ersekës që janë shumë të emancipuara. Dhe padyshim ato nuk lejojnë të nëpërkëmben dhe durojnë dhunën. Besoj se të gjitha gratë në një moment të caktuar të jetës së tyre kalojnë momente të vështira. Është e rëndësishme të dimë si ta trajtojmë dhe të dimë t’i zgjidhim problemet pa arritur në akte fatale që u sollën nga aktoret e mrekullueshme”, u shpreh Dade.
Alesia Xhemalaj, një aktore e re në moshë pati një mesazh për bashkëmoshataret e saj.
“Mesazhi im ndaj tyre është i njëjti mesazh që ne themi dhe ne e vepër. Mos kini frikë, ngriheni zërin se fajin nuk e kemi ne”, deklaroi Xhemalaj, transmeton ‘euronews albania’.
Regjisorja e shfaqjes Driada Dervishi shprehet se inicimi i kësaj shfaqje ka ardhur duke parë situatën aktuale të dhunës ndaj grave në Durrës.
“E gjitha kjo ka nisur nga sondazhet të INSTAT në Durrës ku dhuna ndaj grave është rritur në mënyrë shqetësuese por edhe ne rrethet e Shqipërisë, për shkak të pandemisë, rritje e denoncimeve ndaj dhunës ndaj grave. Bëni atë që mendoni që ju bën të lumtura dhe asnjëherë mos lejoni dikë tu trajtojë kështu”, tha Dervishi.
“Këpucët e kuqe” synohet të vendoset në disa skena teatrale të Shqipërisë, duke synuar kështu sensibilizimin e ndërgjegjësimin e shoqërisë shqiptare mbi dhunën ndaj grave.
——————————
Lexo edhe:
RRËFIMI I MARGARITA XHEPËS: JA SI ISHTE TË MERRESHE ME ART NË KOMUNIZËM…
ObserverKult
