Poetja Irma Kurti boton në Itali librin e 25 në gjuhën shqipe me titull “Ti je loti im”. Përmbledhja poetike mban logon e Shtëpisë Botuese “Youcanprint“.
“Ti je loti im”, siç thuhet në parathënien e shkruar nga autorja, përmban shtatëdhjetë poezi të pabotuara më parë. Në të gjen vargje kushtuar dashurisë, ndjesive dhe emocioneve të autores në muajt e vështirë të sëmundjes së babait të saj deri në ditën e fundit të jetës, dëshpërimit për ikjen pa kthim të tij, brishtësisë gjatë asaj periudhe të vështirë dhe përpjekjeve për të qëndruar pozitive e për të gjetur rrezet e diellit në mjegull.
Ka dhimbje, zhgënjim dhe qiell gri, por edhe dëshirë për të takuar dritën, qetësinë shpirtërore e lumturinë.
Irma Kurti lidhur me këtë thotë: “Ky libër, megjithë vargjet paksa të trishta, është i rëndësishëm për mua sepse shënon librin e 25-të në gjuhën shqipe dhe është tregues i rrugëtimit tim të gjatë letrar, plot emocione dhe magji. Ndihem edhe krenare se, megjithë kalimin e viteve dhe të jetuarit në Itali, gjuha shqipe mbetet fillesa e çdo libri tim: të gjitha veprat, edhe ato të botuara në gjuhën italiane apo angleze janë përkthime nga gjuha shqipe”, transmeton ‘diasporashqiptare.al’.
Irma Kurti ka filluar të shkruajë e të botojë poezi që në moshë të vogël. Në vitin 1980 u nderua me çmimin e parë në konkursin kombëtar me rastin e 35-vjetorit të revistës “Pionieri”. Ndërsa në 1989 fitoi çmimin e dytë në konkursin e organizuar nga Radio – Tirana, me rastin e 45-vjetorit të çlirimit të Shqipërisë.
Për poezinë dhe prozën i janë akorduar 70 çmime në konkurse të ndryshme letrare në Itali e Zvicër. Shumë prej të cilave kanë qenë çmime të para.
Ka shkruar rreth 150 tekste këngësh dhe është pjesëmarrëse në festivale të muzikës së lehtë në Shqipëri, Kosovë e Maqedoni.
Ka botuar shtatëmbëdhjetë libra në italisht dhe gjashtë në anglisht. Po ashtu, është përkthyese e 10 librave të autorëve të ndryshëm. Si dhe e të gjitha veprave të saj në italisht dhe anglisht.
Lexo edhe:
POETJA IRMA KURTI FITUESE E KONKURSIT LETRAR “FRAZAT MË TË BUKURA TË DASHURISË”
ObserverKult
