Poezi nga Nick Cave
Në aeroportin Metropolitan Wayne County në Detroit
Një erë e fortë hodhi në erë dhomën e magazinimit që mbante
Qeset për vjellje të Delta Air Lines. Kjo është e vërtetë.
Dhe të bartura nga ajo erë e madhe, ato fluturuan;
Ato mijëra qese për vjellje,
Si një ushtri engjëjsh me krahë letre,
Mbi qytetin e brendshëm të Detroitit të rrënuar që të lë pa frymë.
Të lutem mos më harro!
Përgjërohej megalopoli i shkretë buzë lumit.
Ne jemi emisarë me krahë të Perëndisë!
Mos bëj gjëmë! Nuk do të harrohesh!
Me kalimin e kohës, të gjithë do të banojnë brenda teje.
Të lutem mos më harro!
I përgjërohej të arratisurit që fshihej në hotel.
Ne jemi emisarë me krahë të Perëndisë!
Bëhu gati! Ne nuk do të të harrojmë!
Ne kemi ardhur që të të çojmë në shtëpi.
Të lutem mos më harro!
Qante djaloshi që dridhej në shinat e trenit.
Ne jemi emisarë me krahë të Perëndisë!
Mos kij frikë! Ti nuk do të harrohesh! Dëgjo!
Do të jetosh gjithmonë në zgrip dhe do të kujtosh se je vetëm,
Ama ti nuk je vetëm.
Krejt historia është e lidhur për kyçin tënd, krejt kujtesa,
Krejt familja dhe miqtë, të gjithë armiqtë,
Të gjithë politikanët dhe vendimmarrësit,
Të gjithë biznismenët,
Të gjithë mjeshtrit dhe mësuesit –
Do të varen si piano nga thembrat tua,
Por ngadalësoje frymën tënde dhe hidhe hapin e parë me guxim.
Të biesh në greminë e botën të kesh mbi vete,
Dhe ti do ta shohësh.
Ti do të fluturosh lart në krahët e guximshëm të qeses tënde për vjellje!
Do të jetë e vështirë, ama ti do të ngrihesh!
Por jij i paralajmëruar! Do të gjykohesh dhe do të gjykohesh ashpër,
Ama vetëm nga ata që nuk guxuan të kërcejnë.
Ata do të rrinë ulur dhe do të thonë, ai tradhtari, ai pozeri i hamamtë,
Shikoje atë! Kush hamamin kujton se është ai?
Ama ti nuk je asnjë nga këto gjëra.
Ti je një kërcimtar i bukur,
Shirita pasues të gëzimit dhe mirënjohjes
Rreth një dielli pa kufi.
Përktheu: Fadil Bajraj
Lexo edhe:
