Macet kanë më shumë liri se gratë në Afganistan, ka thënë aktorja hollivudiane Meryl Streep, në një apel drejtuar komunitetit ndërkombëtar që të fokusohet në gjendjen e grave dhe vajzave afgane.
Komentet e Streep vijnë pasi qeveria talebane muajin e kaluar prezantoi një grup të ri “ligjesh morale” e që shtojnë një sërë kufizimesh që regjimi ka vendosur ndaj grave dhe vajzave afgane që nga kthimi në pushtet tre vjet më parë.
Gratë duhet të mbulojnë plotësisht fytyrën dhe trupin e tyre kur dalin nga shtëpitë e tyre. Gratë dhe vajzat gjithashtu nuk lejohen të shkojnë në shkolla, parqe, palestra dhe klube sportive. Ka kufizime po ashtu për llojin e punës që ata lejohen të bëjnë.
“Sot në Kabul, një mace ka më shumë liri se një grua. Një mace mund të dalë jashtë dhe të ndjejë diellin. Mund të ndjekë një ketër në park. Një ketër ka më shumë të drejta se një vajzë në Afganistan sot, sepse parqet publike janë të mbyllura. Për gratë dhe vajzat një zog mund të këndojë në Kabul, por vajza jo, gruaja jo në publik, “tha Streep.
“Mënyra se si kjo shoqëri është e strukturuar keq është një paralajmërim për pjesën tjetër të botës,” tha Streep .
Talebanët morën pushtetin në gusht 2021 kur forcat e udhëhequra nga SHBA u tërhoqën pas 20 vitesh luftë.
Kombet e Bashkuara kanë kërkuar një qasje të unifikuar globale në trajtimin e talebanëve, të cilët kanë kërcënuar të drejtat e grave.
Talibanët kanë kufizuar edhe udhëtimin për gratë pa një kujdestar mashkull.
Talibanët pretendojnë se respektojnë të drejtat sipas interpretimit të tyre të ligjit islam.
Sekretari i Përgjithshëm i Kombeve të Bashkuara, Antonio Guterres, i cili mori pjesë në të njëjtin event, tha se Afganistani “nuk do të zërë kurrë vendin e tij të merituar në skenën globale” pa gra të arsimuara dhe gra në punësim.
ObserverKult
Lexo edhe:
Zhdukja e saj, një nga misteret më të mëdha: Kush ishte Amelia Earhart?
