Pak ditë pas Tiranës, Forumi i Shkrimtarëve Shqiptarë – Forumi 26 është prezantuar edhe në Prishtinë, duke rikonfirmuar synimin e Forumit për të vepruar si një organizim mbarëshqiptar, që kërkon të ndikojë në mënyrë të vetëdijshme dhe të strukturuar në zhvillimet e letërsisë bashkëkohore shqipe.
Forumi 26 është menduar si një platformë e artikuluar intelektuale, e cila synon të krijojë një kornizë të qëndrueshme bashkëpunimi mes autorëve shqiptarë, pavarësisht kontekstit shtetëror apo gjeografik ku ata veprojnë.
Në themel të kësaj nisme qëndron konceptimi i letërsisë shqipe si një sistem kulturor i integruar, me koherencë të brendshme estetike dhe historike, ndërsa gjuha shqipe trajtohet si matrica e përbashkët simbolike e këtij sistemi.
Në këtë perspektivë, Forumi synon të institucionalizojë dialogun estetik dhe kritik, të nxisë shkëmbimin profesional ndërmjet autorëve dhe të kontribuojë në formësimin e një politike kulturore më të artikuluar ndaj librit dhe krijimtarisë.
Qasja e tij mbështetet në përgjegjësinë publike të shkrimtarit dhe në nevojën për një ndërveprim më të strukturuar mes krijuesve dhe institucioneve.
Ju ftojmë ta ndiqni videon ⬇
ObserverKult
