E frymëzuar nga xhubleta shqiptare dhe e projektuar në bashkëpunim me studion e njohur daneze BIG – Bjarke Ingels Group, ndërtesa e ardhshme e Teatrit të Operës dhe Baletit të Kosovës synon të ndërthurë trashëgiminë kulturore me arkitekturën bashkëkohore.
Kompania ALB-Architect, pjesë e ekipit projektues, ka ndarë detaje nga prezantimi i ecurisë së projektit, duke e cilësuar atë si një nga veprat më të rëndësishme kulturore dhe arkitekturore të vendit.
Në qendër të konceptit qëndron një element i identitetit shqiptar: xhubleta. Sipas kompanisë, frymëzimi nga kjo veshje tradicionale e kthen trashëgiminë në pikënisje për një institucion që do t’u shërbejë brezave të ardhshëm.
“Në këtë projekt, trashëgimia jonë kombëtare merr formë përmes arkitekturës bashkëkohore. Një element i identitetit tonë kulturor shndërrohet në frymëzim për një institucion që do t’u shërbejë brezave të ardhshëm”, thuhet në njoftimin e ALB-Architect.
Kompania rikujton se mjeshtëria e punimit të xhubletës është përfshirë në vitin 2022 në trashëgiminë kulturore jomateriale të UNESCO-s.
ObserverKult
Lexo edhe:
Shkrimtari britanik, M. John Harrison, fiton çmimin “Booker” në moshën 81-vjeçare
