Nga Arif Molliqi
Gjithë jetën një ujk avdall
na bie n´torishtë tinëz
na i ha delet
na e kafshon çobanin
derisa na ha
ne mendojmë se jemi n´ëndërr
si në legjendat ballkanike
kafsha grabitqare nuk zbutet
në torishtë me qengjin
në Evropën e plakur
janë rinuar prostitutat
na thonë jetoni në liri
e liri nuk është kjo…
30.5.23
ObserverKult
Lexo edhe:
SHKRIMTARI ARIF MOLLIQI SJELL PËR LEXUESIT “KRESHNIKËT” E BOKSH BARUTIT
Nga Sabit Rrustemi
Shkrimtari dhe krijuesi Arif Molliqi, i cili prej tri dekadash e sa jeton e krijon në mërgatë (Gjermani ), pas një serë veprash në poezi, prozë dhe publicistikë, kësaj here lexuesit i befason me një vepër të re, ndryshe nga të tjerat.
Bëhet fjalë për përmbledhjen me poezi humoristike, satirike e parodi pikante, me titull, “KRESHNIKËT” E BOKSH BARUTIT, të cilat fshikullojnë përditshmërinë tonë që nga fundi i viteve tetëdhjeta të shekullit të kaluar e këndej, veçmas skenën tonë politike dhe atë, skenën gjithëshqiptare, të cilën, natyrisht për ta parë ashtu si duhet, e karikaturon tej mase përmes vargjeve, duke ia shpërfaqur në publik, përmes petkit poetik, të gjitha të palarat, gafet, naivitetet, sorollitjet, mendjemadhësit e kapërdisjet e shfrenuara brenda e jashtë trojeve tona.
Një pjesë e lexuesve si dhe njohësve të letërsisë, veçmas bashkohanikët e Arif Molliqit, e dinë që Boksh Baruti është pseudonimi i hershëm i shkrimtarit, qysh nga vitet shtatëdhjeta kur kishte filluar të merrej me humor dhe ishte njëri nga bashkëpunëtortët e zellshëm të revistës për humor e satirë, THUMBI nga Prishtina.
Arif Molliqi, këtë mjeshtri të stërholluar të humorit e satirës si dhe këngëve parodike nga kjo fushë, e ka ushtruar edhe më vonë, në revista të kësaj natyre, në portale e rrjete sociale, duke dëshmuar një afinitet solid në shkrimin e kësaj poezie po dhe një guxim e shkathtësi në gjetjen dhe mbarështrimin e dukurive të ndryshme nga realiteti ynë i përditshëm që, dashur pa dashur, shndërrohet në “lëndë të parë”, për këtë krijues të palodhshëm.
Tekstin e plotë mund ta lexoni KËTU:
ObserverKult
