Një shkencëtar kompjuterik që ndihmoi në ndërtimin e Inteligjencës Artificiale ka zbuluar punën e vetme që do t’u rekomandonte njerëzve të zgjedhin. Ish-punonjësi i Google, Geoffrey Hinton, është në një mision për të rritur ndërgjegjësimin për rreziqet e Inteligjencës Artificiale (IA) pavarësisht se ka ndihmuar në formësimin e saj, në “përbindëshin” që ne njohim sot.
I quajtur “Babai” i IA-së, 77-vjeçari dha dorëheqjen në vitin 2023 me qëllimin për të paralajmëruar njerëzit për rrezikun që paraqet IA, të cilin ai e sheh si kërcënim për njerëzimin.
“Duhet ta pranojmë që kjo gjë është një kërcënim ekzistencial dhe duhet të përballemi me mundësinë që, nëse nuk bëjmë diçka shpejt, po i afrohemi fundit,” shpjegoi ai për Steven Bartlett në podcastin “The Diary of a CEO”.
Pra, nëse një psikolog shpreh frikë se IA mund të marrë kontrollin e botës, ndoshta është koha të fillojmë të përgatitemi… dhe, sipas tij, një mënyrë është të zgjedhim me kujdes profesionet që ndjekim. Në rregull, eksplorimi i mundësive të karrierës ndoshta nuk është përgatitje për një skenar si filmi “I, Robot”, por do të ndihmojë në vitet që vijnë përpara një bote të dominuar nga IA.
Kur u pyet se çfarë këshille do t’u jepte njerëzve për të ardhmen e tyre profesionale, Hinton u përgjigj:
“Për momentin, do të thoja se do të duhet shumë kohë derisa IA të bëhet po aq e aftë në manipulim fizik sa ne, ndaj një zgjedhje e zgjuar do të ishte të bëhesh hidraulik.”
Bartlett më pas ngriti pyetjen se cilat industri janë më në rrezik për t’u zëvendësuar tërësisht nga IA, duke përmendur juristët dhe kontabilistët si shembuj të mundshëm. Hinton iu përgjigj:
“Po, prandaj përmenda hidraulikët, mendoj se ata janë më pak të rrezikuar. Ndërsa dikush si një asistent ligjor, një jurist, nuk do ta kemi më nevojë për ta për shumë gjatë.”
Hinton nuk është i vetmi që shpreh frikë për të ardhmen e “fëmijëve dhe nipërve” të tij. Elon Musk gjithashtu është pyetur për zhvillimin e IA-së dhe çfarë karriere do t’u rekomandonte fëmijëve të tij.
“Po, kjo është një pyetje e vështirë,” u përgjigj CEO i Tesla-s për CNBC pas një pauze të gjatë prej 13 sekondash.
“Do të thosha që të ndjekin zemrën e tyre përsa i përket asaj që u duket interesante apo që u jep ndjesinë si të përmbushur. Në fakt, nëse mendoj shumë për këtë, më demoralizon dhe më demotivon, sepse kam derdhur shumë gjak, djersë dhe lot për të ndërtuar kompanitë, dhe më pas mendoj, ‘prit pak, a duhet të jem duke bërë këtë?’”
ObserverKult
Lexo edhe:
