Shembja e godinave të Gardës së Republikës, në afërsi të Parkut të Liqenit Artificial të Tiranës, i ka hapur rrugë ngritjes së kullave shumëkatëshe, projektet dhe ndërtimet e të cilave kanë filluar.
Në zonë janë shfaqur maketet e para të kullave, ku në atë pronë, e cila ka qenë deri para pak kohësh publike, do të ndërtohen hotele luksoze dhe godina banimi.
Pak kohë më parë, kryetari i Bashkisë së Tiranës, Erion Veliaj, do të deklaronte se me largimin e godinave të Gardës së Republikës, parku do të zgjerohej.
Në fakt do të zgjerohen vetëm kullat, të cilat do të shtrihen deri në brendësi të parkut apo zonës së ish-gardës. BoldNews.al ka hulumtuar para pak muajsh edhe tenderin e Veliajt për rrugën, që shkatërronte godinat ekzistuese për t’i hapur rrugën ndërtimeve shumëkatëshe.
Ndërkohë, publikohet edhe projekti Veliaj-Margariti për zhvendosjen e Teatrit të Kukullave në atë vend, por që në fakt do të rrethohet sërish nga ato kulla.
Sipas dokumenteve, Ministria e Kulturës ka hapur tenderin me objekt “ndërtimi i një objekti/qendre të re multifuksionale në funksion të së ardhmes së edukimit artistik të fëmijëve në kryeqytet, pranë qendrës Kombëtare të Kulturës për Fëmijë dhe Teatrit të Kukullave”. Fondi limit i kësaj procedure është plot 1.035.362.461 lekë pa TVSH, ose me TVSH rreth 10 milionë euro. Kohëzgjatja e kontratës është 24 muaj, ndërsa tenderi do të zhvillohet në muajin shtator 2022.
“Qëllimi i punës së këtij relacioni është projektimi i strukturës me porositës Ministria e Kulturës. Struktura e godinës do të jetë b/arme. Godina ka 1 kat nën tokë dhe 8 kate mbi tokë. Lartësia e saj është 34 m”, thuhet në këto dokumente.
BoldNews.al vijoi të hulumtojë dokumentet e tenderit, ndërsa ajo që ra në sy është se Teatri do të jetë në mes të kullave shumëkatëshe që do ndërtohen apo kanë filluar që të vendosin themelet në atë zonë.
Shikoni pak me vëmendje foton nr.2, e cila gjendet në dokumentet e vetë Ministrisë së Kulturës. Teatri do të jetë në mes të dy kullave shumëkatëshe, për të cilat ka informacion se do të jenë hotele luksoze apo qendra tregtare. I gjithë synimi i Erion Veliajt dhe i pushtetarëve të tjerë kanë qenë pikërisht kullat dhe jo godinat publike, të cilat janë në këtë rast kamuflim.
Megjithatë, paradoksalisht, Ministria e Kulturës shkruan në dokumente dhe “projekti urbanistik ka të bëjë para së gjithash me zgjerimin e Parkut të Tiranës”. Çfarë zgjerimi zonja Margariti?! Kullat shumëkatëshe? Ministria thotë se projektet i mundësojnë kthimin e një parcele të madhe toke sferës publike. “Çdo ndërtesë do të krijojë një lidhje unike me parkun dhe do të shërbejë si një portë për në park”, shkruan ministria.
U hulumtuan dokumentet e Ministrisë së Kulturës, të cilat në brendësi kishin edhe projektet që do zhvillohen në atë zonë. Një ndër to ishte edhe një godinë shumëkatëshe. Po, çfarë është ajo godinë, publike apo private? U siguruan dokumente dhe foto nga ajo zonë ku ka filluar të ndërtohet projekti “Nova Hotel” me 5 yje.
Sipas projektit të miratuar nga Bashkia e Tiranës, do të jetë një godinë me funksion hotel, zyra dhe shërbime. Ndërsa godina do të jetë 14 kate mbi tokë dhe 3 kate nën tokë. Sipas tabelës së vendosur në atë zonë, ndërtimi ka filluar në datën 18 qershor 2021 ndërsa ka një afat prej 71 muajsh.
Sipas fotove dhe projektit, godina është e njëjtë me atë të ilustruar në dokumentet e vetë Ministrisë së Kulturës. Pra, do të jetë ngjitur me Teatrin e Ri të Kukullave. Ndërkohë, sërish ngjitur me atë teatër do të ndërtohet një tjetër kullë, për të cilën nuk ka informacione deri më tani se çfarë do të jetë; Qendër Tregtare, hotel apo godinë publike?!/boldnews.al
Lexo edhe:
TEATRI EKSPERIMENTAL NË TRANZICION, AKTORËT NË PRITJE DHE ANKTH
ObserverKult
