reklamë

“Buqetë filozofike” nga Ismail Syla

ismail syla

Nga Ismail Syla

Aristoteli dhe dy gjethet

Nxënësi solli dy gjethe
nga e njëjta pemë.

Njëra ishte e madhe,
tjetra e mbledhur dhe e zbehtë.

– Cila është gjethja e vërtetë e fikut?

Aristoteli i vendosi pranë.

– Nga i more?

– Të madhen nga dega mbi pus.
Tjetrën nga ana e murit.

Aristoteli u ngrit.

– Po shkojmë te pema.

Nxënësi zgjati dorën t’i merrte.

– Lëri. Merr kovën me ujë.

Platoni dhe poçari

Poçari e la mënjanë
një kupë që kishte dalë shtrembër.
– Kjo nuk doli siç duhej.

Platoni e rrotulloi mes duarve.
– Çfarë do të bësh me të?
– Do ta thyej.

Nga dera hyri një fëmijë
dhe kërkoi ujë.

Poçari mori kupën,
e mbushi
dhe ia afroi.

Fëmija piu me të dyja duart.

– E ke mbaruar? e pyeti Platoni poçarin.

Ai vazhdonte ta shihte fëmijën.

Seneka dhe Musoni

Një shërbëtor solli ujë
dhe rrëzoi gotën te pragu.

U përkul menjëherë,
me duart që i dridheshin.

Seneka pushoi së foluri.

Musoni i zgjati pecetën
dhe i tha të mos prekte copat.

Kur mbetën vetëm,
Seneka kërkoi ta vazhdonin bisedën.

– Çfarë po thosha?

Musoni pa nga dera.
– Se zemërimi kalon shpejt.

Kanti dhe ora

Burri që i ndihmonte në shtëpi
erdhi më vonë se zakonisht.

Kanti ngriti sytë nga ora.
– U vonove.

– Një plak kishte rrëzuar karrocën.
Ia mblodha mollët.

Kanti e mbylli librin.
– U vra?
– Jo. Vetëm nuk ngrihej dot.

Kanti i tregoi karrigen pranë sobës.

– Ulu pak.
Më thuaj nëse mbeti dikush me të?

Dekarti dhe Elizabeta

Dekarti po shpjegonte
ndarjen e shpirtit nga trupi.

Elizabeta e dëgjonte
me dorën mbështetur te balli.

– Nuk të bind? e pyeti.
– Sot më dhemb koka.
Ai i afroi një gotë ujë.

Ajo piu
dhe e la gotën mes tyre.

– Ta vazhdojmë nesër? tha Dekarti.
(Elizabeta e preku faqen e shënuar.)

– Mbaje mend
ku na ndërpreu trupi.

Simone de Beauvoir dhe Sartre

Sartre i zgjati faqen e lrtrës
ku po shkruante për lirinë.

Beauvoir lexoi disa rreshta.

Pranë tyre, kamarierja
po mblidhte karriget bosh.

– Do të rrini gjatë? pyeti ajo.
– Edhe pak, tha Sartre.

Beauvoir pa sallën e zbrazur,
pastaj mori pallton.

– Ku po shkon? e pyeti ai.

Ajo ia palosi letrën.
– Mund të vazhdojmë rrugës.

Prishtinë, nëntor 2026

ObserverKult