Çmimi „Dielli Dardan“, i ndahet gazetarit Rexhep Rifati

04/12/2020 • 09:33

Nga Shqipe Bytyçi

Lidhja e Krijuesve Shqiptarë në Mërgatë, për nder të festës së 28 NËNTORIT ndau mirënjohje për zhanre të ndryshme arti në mërgatë. Tetë krijues morën çmime dhe mirënjohje të ndryshme, ndër ta për veprimtari jetësore, gazetari Rexhep Rifati mori çmimin „Dielli Dardan“.

Musa Jupolli, kryetar i LKSHM shkruan: „Për Vepër Jetësore „Dielli Dardan“ çmohet kontributi i Rexhep Rifatit n’udhëtimet e tij të palodhshme, ku gjejmë shpirtin e krijuesit, gazetarit e fotografit me përshkrime dhe filozofi të pasur, me fotografi kujtimi që do të ruhen brez pas brezi, me theks udhëtimet e Z. Rifatit në venbanimet e arbëreshëve janë pasuri që i kalojnë të gjitha çmimet!“

Të paktë janë ata që nuk e njohin gazetarin e palodhur Rexhep Rifati. Librat e botuara janë vlera që i përcillen dhe i lihen historisë. Ato lindin si kërkesa shpirtërore nga krijues, poet e shkrimtarë, lindin në kohëra të ndryshme, në kushte të ndryshme dhe mbajnë në vete porosinë që ju përcillet dhe ju dhurohet gjeneratave të ardhshme. Rexhep Rifati i dhuroi dhe vazhdon t’i dhurojë shumë kulturës shqiptare, ai vazhdon të jep pa kërkuar asgjë në kthim dhe pikërisht këtu qëndron vlera e shtuar e të urtit Rexhep Rifatit.

Rexhep Rifati, një figurë e dashur dhe e respektuar jo vetëm në diasporë, por gjithandej trojeve shqiptare u lind në vitin 1942 në Komogllavë të Ferizajt, ku edhe kreu shkollimin e ulët dhe ate të mesëm, ndërsa në vitin 1973 diplomoi në Fakultetin Filozofik në Prishtinë, Dega Gjuhë dhe Letërsi Shqipe. Ai punoj afro tri decenie si gazetar i të përditshmes “Rilindja”, njëkohësisht ofroi kontributin e tij të vlefshëm në organizimin e jetës kulturore në Ferizaj. Në vitin 1995 për shkak të presionit dhe dhunes serbe, migroi në Zvicër ku vazhdoj të mirret me shkrime si gazetar dhe redaktor në gazeta si dhe portale të ndryshme, për t’u kthyer në një fytyrë emblatike të diaspores. Baci Rexhë, ashtu siç me shumë respekt dhe dashuri e thërrasin të rinj dhe të moshuar ishte me kamerën dhe penën e tij kudo dhe kurdo, çdoherë në përcjelljen dhe promovimin e vlerave shqiptare në secilin cep të Zvicrës, në Itali te Arbëreshët, në Europë dhe anekënd trojeve shqiptare. Ai ishte aty ku diplomohej studenti shqiptar, ku promovohej arti, ku mësohej gjuha shqipe, ku bizneset frymonin shqip, ku prekeshin arritjet kolektive ose personale të bashkëkombasëve të tij dhe Baci Rexhë ju gëzohej sukseseve të tyre, shkruante për ta, motivonte gjenerata të tëra për suksese të reja. Nga këto rrugëtime të gjata dhe të pandalura ai në vitin 2013 nxorri edhe librin e tij të parë « Shqiptarët në Zvicër- 1001 pamje“ ku paraqiti një tablo të bukur të shqiptarëve të Zvicrës dhe sukseseve të tyre. Në vitin 2018 botoi librin „Shtegtimet e një gazetari“ ku me fotografi që flasin sa njëmijë fjalë por edhe me shkrime dëftoi rrugëtimin e tij nëpër vise shqiptare, për monumente kulture, rite dhe artefakte, shoqata shqiptare, personalitete të njohura të diaspores.

Çmimi „Dielli Dardan“, nga Lidhja e Krijuesve Shqiptarë në Mërgatë, këtë vit ndahet për herë të parë dhe ate pikërisht gazetarit të palodhur Rexhep Rifati, të cilit poeti Mentor Thaqi në një poezi i drejtohet me vargjet “Ec djalosh, ec/ shkrepe e ndrite me penë/ Rininë mbaje, se të mbanë/ Shtatëdhjetë vjet në vrapim/ Pesëdhjetë vjet në veprim…“/ ObserverKult