Biblioteka Kombëtare e Shqipërisë së fundmi ka çelur një ekspozitë në nder të 180-vjetorit të lindjes së arbëreshit Zef Serembe i cili lindi më 1844 dhe vdiq më 1901.
Ekspozita sjell në vëmendje të lexuesit gjithë krijimtarinë e poetit lirik që ndodhet në koleksionet e BKSH-së.
Zef Serembe lëvroi gjerësisht lirikën me një tematikë të larmishme, krijoi lirika atdhetare, filozofike, shoqërore e të dashurisë. Në vjershat atdhetare grishi në luftë të hapur kundër pushtuesit osman (“Vrull”, “Dora d’Istrias”).
Lirika e tij filozofike-shoqërore dhe e dashurisë pasqyroi konfliktin midis individit dhe shoqërisë së kohës, duke sjellë një hero të ri, kryengritësin individual të vetmuar dhe të zhgënjyer nga jeta.
Në poezinë e tij të përshkuar nga një ndjenjë malli, gërshetohen optimizmi e stoicizmi me nota të trishtuara mistike e pesimiste.
Poezia e tij është shprehje e kontradiktave dhe e zhgënjimit tragjik që përjetonin intelektualët arbëreshë. Poeti kërkon strehë e ngushëllim te feja, po edhe ajo nuk e qetëson.
Nota e re kushtruese që dallon lirikën atdhetare dhe një pjesë të lirikës shoqërore të Serembes gjeti shprehje kryesisht përmes stilit patetiko-oratorik; motivet e zhgënjimit, të vetmisë, konflikti me shoqërinë, gjetën shprehje kryesisht përmes stilit liriko-introspektiv.
Ky i fundit harmonizohet me veçoritë e individualitetit krijues të Serembes, të spontanitetit gati naiv, që e bën poezinë e tij të freskët e komunikuese.
Poezia e Serembes është një poezi ngjyrash e dritash të forta. Figurat e tij më të dashura janë antitezat, metafora e simbolet. Zef Serembe vijoi traditën e ndikimit nga poezia popullore.
Shumë prej krijimeve të Serembes (poezi, drama dhe një përkthim i Psalmeve të Davidit), që ai shpesh i rishikonte e i ndryshonte, humbën gjatë jetës së tij endacake.
Sa qe gjallë ai botoi vetëm: “Poesie italiane e canti originali tradotti dall`àlbanese” (Poezi italisht dhe këngë origjinale të përkthyera nga shqipja – Kozencë, 1883)/ Solli në italisht dhe shqip; “Il reduce soldato, ballata lirica” (Kthimi i ushtarit, baladë lirike), vargje vetëm në italisht; “Sonetti vari”, një përmbledhje prej 42 sonetesh me një parathënie, me një shkrim të imtë të ndrydhur në vetëm 4 faqe.
Ekspozita do të qëndrojë e hapur për publikun në Sallën Shkencore të BKSH-së.
ObserverKult
Lexo edhe:
ALBIN KURTI, HAJRULLA ÇEKU E BERNARD ÇOBAJ VIZITOJNË EKSPOZITËN E GJELOSH GJOKAJT
Kryeministri i Kosovës, Albin Kurti, ministri i MKRS-së, Hajrulla Çeku dhe ambasadori i Malit të Zi në Kosovë, Bernard Çobaj, kanë vizituar së fundmi Galerinë Kombëtare të Kosovës. Ata kanë parë nga afër ekspozitën retrospektive të artistit të ndjerë. Gjelosh Gjokaj “Rrugëtimi Modernist i Gjelosh Gjokaj”. Kjo ekspozitë është kuruar nga Shkëlzen Maliqi.
Në ekspozitë janë të përfshira vepra nga e gjithë krijimtaria artistike e Gjelosh Gjokajt. Përbëhet nga dy koleksione të artit.
Koleksioni bazë, me 75 vepra të artistit nga Sead Gjokajt, kushëririt të tij nga Podgorica. 18 vepra nga fondi i Galerisë Kombëtare të Kosovës.
Ekspozita që po vizitohet çdo ditë. Kjo ekspozitë është përkrahur nga MK. Për publikun është e hapur deri më 7 korrik.
Tekstin e plotë mund ta lexoni KËTU:
ObserverKult
