Legjendat e krahinës së Lumës në Kukës janë përmbledhur në një libër shkruar nga Petrit Palushi. Po kështu libri është përkthyer në anglisht nga Hekuran Koka në mënyrë që t’i shërbeje turizmit historik.
Në Kukës u promovua libri “Eposi i Bjeshkëve të Lumës” me 60 legjenda të mbledhura në terren dhe të rishkruara nga shkrimtari Petrit Palushi. Legjendat janë strukturuar në formë të shkurtuar dhe të rrëfyera në dialektin geg. Piktori Bib Frrokaj këto legjenda i ilustroi nëpërmjet pikturave, të cilat u ekpozuan në korridorin e Pallatit të Kulturës “Hasan Prishtina” te Kukësit.
“Të gjitha janë lidhura me bjeshkët me historitë, me zanat me shtojzovallet, thotë autori Petrit Palushi, i cili veçon legjendën ‘Tumja e Kajës’: Këtu do të gjeni një legjendë ndër më të bukurat në letersinë shqipe, quhet ‘Tumja e Kajës’ dhe tregon se zanat e sjellin Kajën tek nëna e vet, nëna vdes e bëhet gurë dhe guri bëhet dritë”.
Ky libër vjen i përkthyer edhe në anglisht nga poeti dhe njëherësh përkthyesi Hekuran Koka.
“Ky libër do t’i vlejë brezave të rinj por dhe turizmit. Në libër janë 60 legjenda që shoqerohen dhe me hartë që identifikon vendet nga ku burojnë ato. Mbledhja e trashegimise kulturore në terren është shumë e rëndësishme ndaj e sjellim në dy gjuhë në shqip dhe anglisht, që ta njohin dhe turistët krijimtarinë e Lumës”, u shpreh Koka.
Luma është një ndër krahinat më të njohura në verlindje të Shqipërisë me tradita e histori. Kufizohet me Hasin, Prizrenin dhe Dibrën. Krahina e merr emrin nga lumi ‘LUMA’ qe rrjedh mes dy maleve madhështore Koritnik dhe Gjallica. Shkrimtarja britanike Edith Durham kur kaloi nëpër Lumë në vitin 1905 shkruante “Luma është një ndër krahinat më të forta dhe burrërore muslimane në Gegni”./shqiptarja.com
ObserverKult
Lexo edhe:
PETRIT PALUSHI: VEPRA E AGIM SPAHIUT ERDHI SI DEMONSTRIM I NJË POEZIE EKZISTENCIALISTE
