Sopranoja shqiptare Ermonela Jaho, është një nga yjet e skenave botërore, me role në shfaqje të ndryshme të operës ku ka marrë shumë vlerësime. Si personazh në serinë “Opera në kohën e virusit Covid-19” të faqes “OperaWire”, sopranoja shqiptare shprehet mes të tjerash, se publiku do ta kuptojë se çfarë sakrificash kërkon kjo kohë edhe nga të gjithë artistët.
“Mendoj se ndikimi më i madh, do të jetë që të kuptojmë se ky profesion është jashtëzakonisht i cënueshëm. Shpresoj që publiku do ta kuptojë tani, çfarë sakrificash kërkon nga të gjithë artistët, që të jenë në skenë dhe të nxjerrin jetesën nga arti i tyre. Zhvillimi i ri do të jetë transmetimi online, siç e kemi parë. Edhe pse asgjë nuk e zëvendëson emocionin e pastër të të qenit afër artistëve gjatë performancave dhe energjinë, që e ata e marrin nga publiku e që transmetohet edhe tek interpretuesit, ne do t’ia arrijmë të gjejmë një mënyrë për ta pasur artin tonë”, – shprehet sopranoja Jaho.
Operat “Madama Butterfly” , “La traviata” etj, janë disa nga veprat që Jaho, ka shkëlqyer në skena. Sopranoja e njohur, në shkurt të një viti më parë shënoi një tjetër sukses edhe në Mynih, Gjermani. Jaho erdhi në skenë me rolin kryesor, atë të Violetës në operën “La Traviata”, që është shfaqur shumë në teatrot italiane, por edhe në rreth 23 shtete të botës. “La Traviata” me Ermonela Jahon, ishte më herët edhe në skenën e në teatrit të operës “Bayerische”. Me një aktivitet të vlerësuar në skenat botërore, një tjetër shkrim për sopranon, ishte dhe nga “The Guardian”. Kritiku John Crace, pohon se sopranoja është mahnitëse.
“Jaho është sopranoja më e mirë në botë. Pikë. Aftësia e saj për të hyrë në rolet që interpreton, është mahnitëse”, thotë ndër të tjerët John Crace, për prestigjiozen britanike “The Guardian”. Në korrik të një viti më parë sopranoja Ermonela Jaho ishte me operën “Ana Bolena” në skena të huaja. Sopranoja interpretoi rolin kryesor në operën e Donizzetit “Anna Bolena”, në premierën e këtij produksioni, që hapi siparin e Opera Australia në fillim të muajit korrik. “The Economist” dhe “Financial Times” po ashtu shkruajnë me vlerësime atë kohë për sopranon shqiptare.
“Një ëngjëll i zjarrtë”, e cilëson “The Economist”, sopranon shqiptare, për interpretimin e rolit të Ana Bolenës, në operën e Donizzetit./konica
