Në sallën e dedikuar aktiviteteve artistike në kryeministrinë shqiptare të emërtuar “COD”, këto ditë është hapur një ekspozitë shumë interesante, e cila vjen me punime artistike nga dizanjera të brezit të ri nga Italia.
Arti i dizajnit prej shumë kohësh ka qenë i njohur dhe i admirueshëm në botë, pa përjashtuar këtu edhe veprat e arkitekturës që e bëjnë Italinë dhe italianët të krenohen me këtë pjesë të historisë së artit të tyre.
Ekspozita “Gjenerata e re e Dizajnit Italian”, nuk do kishte vend më të mirë për t’u ekspozuar për publikun, pasi edhe vetë objekti i cili sot shërben për institucionin e Kryeministrisë është i krijuar po nga arkitektë italianë sikurse shumë objekte të tjera të rëndësishme në Tiranë, ç’ka lidh më së miri kulturën që ky popull ka në artin vizual dhe shërben si një pikë takimi midis brezave të artistëve.
Shtatë talente të reja, Ilaria Bianchi, Federica Biasi, Matteo Cibic, Serena Confalonieri,
Antonio Facco, Elena Salmistraro, Tipstudio kanë ekspozuar punimet e tyre, nga data 8 korrik deri më 30 gusht 2021, në COD.
Në ambientet e kësaj ekspozite, u takuam me drejtoreshën e COD, Milena Selimi e cila na rrëfeu qëllimin e kësaj ekspozite.
“Është shumë interesante duke nisur që nga pikë takimi që ky brez i ri i dizajnit italian gjendet në Tiranë. Ndërtesa që gjenden veprat e dizajnit italian, gjenden në një objekt që është projektuar nga Gherardo Bosio. Pra kemi një projektues italian që bën takimin midis dizajnit të vjetër dhe të ri italian. Nga shkrimet e kohës gjejmë që ai është marrë vetë me arredimin e interiorin e kryeministrisë së sotme apo të ndërtesës. Flasim për vitet 1935 1940. Ndaj nuk do të kishte një vend më të mirë në Tiranë për të sjell dizajnin italian për këtë gjeneratë të re pasi ai mban vulën si projektues i Tiranës moderne. Këta janë gjenerata e re. Janë 8 pjesëmarrës. Është interesante mënyra si kanë punuar me një estetik minimaliste e cila i prezantohet publikut. Prezantohet nga Instituti Italian i Tiranës dhe është bashkëpunimi i radhës që COD ka patur gjatë viteve. Prandaj ne i ofrojmë publikut këtë ekspozitë deri në datë 31 Gusht në COD. Publiku i Tiranës dhe turistët do ndjekin dy ekspozita paralele. Njëra është “Gjenerata e re e dizajnit italian” dhe “Killing Time”, ekspozitë e artistit Adrian Cene”, u shpreh Selimi për ATSH.
Në këtë sezon vere, për të gjithë ata që ndodhen apo vizitojnë Tiranën, nuk mund ta lënë pa e vizituar këtë ekspozitë shumë interesante dhe të shijojnë vërtetë këto punime të rralla që vijnë të punuara nga duart e brezit të ri të dizanjerëve italianë.
Në ekspozitë gjejmë thjeshtësinë formale dhe estetikën minimaliste të Federica Biasi; dizajnin utopik të Matteo Cibic midis dizajnit, artit dhe artizanatit të lartë; humanizëmin e Antonio Facco që shkon nga arkitektura e brendshme tek objekti; harmoninë e formave dhe stilin poetik të Elena Salmistraro, një përzierje të ilustrimit, dizajnit dhe arteve pamore; eksperimentimin dhe analizën e thelluar mbi materien të dyshes krijuese Tipstudio, që shndërron çdo ide në një produkt narrativ dhe simbolik; format arketipe dhe
gjuhën shprehëse të Ilaria Bianchi drejt një dizajni modeli më kritik dhe konceptual; sipërfaqet grafike të Serena Confalonieri që, në kontrast midis formës dhe ngjyrës, nxjerrin në pah lehtësinë e objekteve.
Dizenjues të rafinuar, kuriozë dhe pa dogma, të cilët po i japin jetë një epoke të re të dizajnit italian, ku liria e shprehjes është pozicionuar në qendër të kërkimit, me krijime me një ndikim të fortë ndjellës që kapërcen në art.
