“Gjuha, letërsia dhe identiteti”, ishte tema boshte e Seminarit XIII Ndërkombëtar të Albanologjisë, i cili i zhvilloi punimet më 25 dhe 26 shtator, në Universitetin e Tetovës.
Më shumë se 100 studiues të gjuhës, letërsisë, historisë, etnologjisë, gazetarisë etj, gjatë dy ditëve në kuadër të punimeve të këtij seminari i paraqitën punimet e tyre shkencore në disa sesione të veçanta.
Prorektori për Shkencë i Universitetit të Tetovës, Prof. Dr. Hazir Pollozhani, në hapjen e punimeve të këtij Seminari vlerësoi se të gjitha referimet shkencore, debatet dhe mendimet që pritet të paraqiten në kuadër të programit të punës, do të nxjerrin në dritë vlera të rëndësishme dhe me peshë shkencore.
“Seminari i Albanologjisë, si institucion shkencor, vlerësojmë se po e kryen me sukses të plotë misionin e tij, duke i tubuar dhe tërhequr vëmendjen e studiuesve eminentë të albanologjisë, nga vendi ynë, rajoni, Evropa dhe Shtetet e Bashkuara të Amerikës. Me angazhimin ndër vite të drejtorisë së këtij Seminari, ajo e ka forcuar bashkëpunimin me studiues të spikatur, duke u shndërruar në model ndërkomunikimi me gjuhëtarë, krijues letrarë, historianë, etnologë dhe studiues të tjerë të shkencës dhe kulturës shqiptare. Me këtë rast, u shprehim mirënjohjen tonë drejtorisë dhe anëtarëve të saj, por edhe Ministrisë së Kulturës të vendit tonë, që i përkrah projektet tona kulturore, si Seminarin e Albanologjisë, por edhe projektet tjera të fakulteteve, profesorëve dhe studentëve të Universitetit të Tetovës”, u shpreh Pollozhani.
Fillimin e punimeve të Seminarit e përshëndeti edhe Ministri i Kulturës i Republikës së Maqedonisë së Veriut, Doc. Dr. Hysni Ismaili, i cili duke iu referuar rëndësisë që ka seminari u shpreh se për shqiptarët në Maqedoninë e Veriut, zhvillimi i albanologjisë nuk është vetëm çështje shkencore, por është edhe çështje identitare e kulturore.
“Një komb që ka universitet publik dhe që arrin të krijojë një ngjarje tradicionale shkencore të këtyre përmasave, dëshmon për seriozitetin e tij dhe për praninë e tij serioze në këtë hapësirë gjeografike, por edhe atë akademike. Në këtë mënyrë Tetova jonë dhe Universiteti ynë dëshmojnë se, ashtu si në Prishtinë dhe Tiranë, albanologjia njësoj zhvillohet edhe te shqiptarët e Maqedonisë”, u shpreh ministri Ismaili.
Drejtori i Seminarit të Albanologjisë, Prof. Dr. Salajdin Saliu tha se këtë vit Seminari punimet i zhvillon në pesë sesione shkencore, atë të historisë, medies, etnokulturës, letërsisë dhe gjuhësisë.
“Në kuadër të Sesionit të historisë janë trajtuar tema si: Shqiptarët dhe Evropa – shqiptarët në raportet diplomatike në shënimet e kronistëve dhe të udhëpërshkruesve, ndërsa në Sesionin e medies është debatuar mbi mediet dhe lajmet e rrejshme, kulturën e medies, si dhe rolin e medies publike. Ndërsa në Sesionin e etnokulturës, tema kyçe ka qenë: “Tjetri në kulturën shqiptare dhe ballkanike”, kurse në Sesionin e letërsisë dhe atë të gjuhësisë janë trajtuar temat nga letërsia, historiografia, identiteti, si dhe dialektet si pasuri gjuhësore”, theksoi Prof. Dr. Salajdin Saliu.
Në kuadër të punimeve të këtij seminari u përuruan edhe veprat:“Sintaksa e Gjuhës Shqipe (përbërësit sintaksorë)”, “Parafjalët e Shqipes Standarde të autorit Prof. Dr. Mehmet Çeliku, dhe veprat e përkthyera:“Gjuha e Albanëve ose Shkipetareve” me autor Xylander 1835, si dhe “Historia dhe Gjuha e Shqiptarëve dhe Vllehëve”, me autor Thunmann 1774, të përkthyera në gjuhën shqipe nga profesorët Albert Gjoka dhe Frida Voskopola Gjoka./ ObserverKult
