Ministrja e Kulturës, Elva Margariti ka shpërndarë një video të këngëtarit lirik shqiptar me famë botërore, Gëzim Myshketa, i cili përcjell mesazhin e tij nga larg, duke i ftuar të gjithë të shkojnë në muze.
Në kuadër të Ditës Ndërkombëtare të Muzeve, Myshketa i bën thirrje bashkatdhetarëve të tij të vizitojnë parqet arkeologjike dhe vendet historike, të cilat do të hapen pikërisht sot.
“Unë nuk dua t’ju flas sot nëpërmjet muzikës, por t’ju jap një mesazh dhe të përpiqemi të dashur miq që në këtë periudhë, sipas mundësive, të vizitojmë parqet tona arkeologjike, vlerat tona muzeale, vendet tona historike të cilat fatmirësisht, falë Zotit dhe trashëgimisë tonë të jashtëzakonshme që të parët tanë na kanë lënë, i kemi me tepricë në atdheun tonë”, shprehet këngëtari lirik në videon e publikuar nga ministrja e Kulturës.
Gjatë periudhës së karantinës, Gëzim Myshketa i ka qëndruar pranë publikut duke i ofruar nga rrjetet sociale interpretim të disa prej kryeveprave të muzikës shqiptare, midis të cilave këngën “Baresha” nga Nexhmije Pagarusha, “Valsi i Lumturisë” nga Vaçe Zela, “Jon” nga Ardit Gjebrea, etj.
