Botuesi i Ismail Kadaresë, shkrimtarit më të madh shqiptar që u nda nga jeta ditën e sotme, Bujar Hudhri, në një intervistë për Top Channel, tregoi se si ishte gjendja e tij shëndetësore para se të vdiste dhe se a i ngeli ndonjë merak.
Hudhri: Nuk e kisha menduar një lajm të tillë, kam menduar që një shkrimtar i madh si Kadare nuk i përket kësaj bote, por një planeti paralel të letërsisë. Më trishton që Kadare më thoshte që shtëpia botuese është shtëpia e dytë e shkrimtarit dhe më shumë se kurrë i ndjej këto fjalë. Unë e kam ndjerë gjithmonë këtë raport timin, unë jam botuesi i tij.
–A iku me ndonjë merak Kadare, çfarë bisedonit?
Hudhri: Mendoj që ka ikur i lumtur, edhe pse nuk i shkon letërsisë së tij kjo fjalë. Ishte i lumtur që vjet Onufri nxori veprën e tij të plotë, që koincidonte 70 vjet me letërsinë e tij, në ato 7 vëllime herë 1000 faqe, jam i lumtur që kjo vepër madhështore u promovua në panairin e librit në Prishtinë. Ishte një atmosferë që Kadare u ndje shumë mirë.
–Si ka qenë gjendja e tij shëndetësore?
Hudhri: Ka qenë i dobët fizikisht, kishte dëshirë të dilte, dilte me vështirësi. Dilte te kafja e tij e preferuar, me miqtë e tij. Ishte në Tiranë dhe kanë qenë orët e tij më të bukura në kafene duke biseduar dhe takuar njerëz.
–A jeni kontaktuar nga personalitete të huaja?
Hurdhi: Kadare është pjesë e thesarit botëror, mori çmimet më të larta, vlerësimi më i madh është që është në panteonen e letërsisë botërore. Një shkrimtar nuk ka lindje dhe vdekje, nuk ka një kufi kohor.
–Kush do të kujdeset për homazhet?
Hurdhi: Homazhet janë marrë përsipër nga Kryeministri.
ObserverKult
Lexo edhe:
KUSH ISHTE ISMAIL KADARE- BIOGRAFIA E KOLOSIT TË LETËRSISË SHQIPE
