Kreu i Sindikatës së Pavarur të Artistëve të Shqipërisë, Rashat Ibrahimi, do t’i dërgojë ministres një shkresë zyrtare për auditim të procesit të përzgjedhjes së logos së re.
Nëse, pas kësaj kërkese ministria do të heshtë, artistët do të protestojnë.
“Dje u mblodhëm të gjithë krerët e sindikatave që dolëm me këtë vendim: “Do t’i kërkojmë Ministrisë së Kulturës zyrtarisht që të dërgojë në mënyrë urgjente auditin”, tha Ibrahimi.
Ndërsa, artistët më në zë, e cilësojnë të pavend heqjen e logos së vjetër.
“Sinqerisht kam menduar, se s’ka pas arsye për të cilën duhet ndërruar logoja, sepse e vjetra i kishte të gjithë elementët brenda”, u shpreh pianistja Etrita Ibrahimi.
“Po ta shikosh logon, nuk përfaqëson asgjë. Plagjiaturë apo jo?! Duhet të presim institucionet që merren me ketë punë”, shtoi baritoni Ylber Gjini.
Lexo edhe: Reagon autori i logos së vjetër: Në të s’kishte element shqiptarë, opera nuk fillon sot
Ministrja e Kulturës Elva Margariti çuditet që mediet merren me një çështje ‘kaq të vogël’.
“Keni tejmase kërkesa, që për mendimin tim janë kërkesa shumë më bazike, në krahasim me kërkesat madhore. Këto janë punët e përditshme të Ministrisë së Kulturës. Është me të vërtetë një nga problematikat më të vogla që po çojmë përpara”.
Fituese e logos së re të TKOB është kompania “Pika Pro”me vlerën 1 845 000 me tvsh.
