Trilogjinë poetike “Zoti vdes i pari” të autorit Afrim Demiri, botuar nga Shtëpia Botuese Littera, nga e hëna lexuesit mund ta gjejnë në librari.
Recensentë të librit janë Faruk Tasholli dhe Vlora Konushevci, për ballinën u kujdes Alba Demiri, ndërsa botimi u përkrah nga Ministria e Kulturës, Rinisë dhe Sportit e Kosovës.
Për librin:
Faruk Tasholli:
Vizueliteti jetësor dhe vizueliteti fiktiv, janë dy kontraste të ashpra në poezinë e Demirit, nga të cilat shfaqen shkëndija panoramike, që vetë poezinë e kthejnë në një çerdhe absurdi, në majë të një kapërcyelli lufta/paqja. Në këtë interferencë figurash, pas vdekjes së një frike e trishtimi, vjen trishtimi i ri, vjen frika e re, që poeti i kundërvihet me protestën shpirtërore aq edhe me reagimin filozofik njerëzor, por gjithmonë i mundur. Vargjet si: Ashensori koha ime vertikale ose shtëpitë po paketohen në shumëkatëshe/ oborret po vdesin korridoreve pa dritë, sa flasin për një anarki lëndore po aq edhe për një anarki morale, ku robi vështirë e gëzon lirinë apo nga vrulli entuziast e degradon atë. Autori, si një i burgosur në anarki, proteston e gjëmon me revoltën përmes shenjave poetike që i spikatë gjuha e metaforave.
Vlora Konushevci
Në poezinë e Afrim Demirit alkimia metaforike shpaloset përmes përdorimit të gjuhës metaforike, duke i shndërruar edhe elementet e zakonshme në simbole me ndikim që pasurojnë shtresat e kuptimit brenda vargjeve. Kështu, poeti Demiri, i distilon të vërtetat tragjike për të ngjallur rezonancë emocionale nga përvoja, që në shikim të parë duket e zakonshme. Pra mjeshtëria e poetit këtu qëndron në aftësinë e tij për të shndërruar të zakonshmen në të jashtëzakonshme, konkreten në abstrakte. Nëpërmjet procesit alkimik të metaforës, ai i fton lexuesit të gërmojnë nën sipërfaqe, të zbulojnë shtresa më të thella kuptimore duke u lidhur me aspektet universale të përvojës njerëzore. Fuqia transformuese e gjuhës metaforike bëhet një katalizator i kuptimit dhe eksplorimit të të vërtetave të fshehura brenda vargjeve që bartin një fuqi të madhe ekspresive.
Për autorin
Afrim Demiri, lindi në vitin 1960, në fshatin Sazli, në Ferizaj. Gjimnazin Matematikor dhe Fakultetin Teknik, drejtimi elektronikë i mbaroi në Prishtinë. Me letërsi filloi të merret në vitet 80-të, duke shkruar poezi, tregime të shkurtra dhe reportazhe. Disa herë punimet e tij u shpërblyen në konkurset letrare. Ishte bashkëthemelues i gazetës lokale Ferpress, si dhe gazetar, moderator dhe redaktor i informacionit në TV Tema. Në periudhën 1997-2015, botoi shkrime publicistike si korrespondent i gazetës “Koha ditore”.
Ka botuar:
“Fjongo e zezë”, poezi, Klubi letrar De rada, Ferizaj, 1994
“Figura e 17-të”, tregime, SHB “Beqir Musliu, Gjilan, 2023, libër ky që u shpërblye nga MKRS-ja si libri më i mirë në prozë gjatë atij viti duke marrë shpërblimin “Anton Pashku”.
Punon si mësimdhënës në IAAP “Pjetër Bogdani”, në Ferizaj.
ObserverKult
lexo edhe:
Littera sjell për lexuesit romanin “Bërja e shkretëtirës” të Ahmet Selmanit
Littera sjell për lexuesit librin “Kangët e Babës” të Bislim Ahmetaj
