Këshilli i Ministrave miratoi sot vendimin për rritjen e pagave të artistëve dhe punonjësve të Teatrit Kombëtar të Operës, Baletit dhe Ansamblit Popullor.
Ministrja e Kulturës, Elva Margariti duke e cilësuar një lajm të mirë, tha në një deklaratë për shtyp se “nga ky vendim përfitojnë 281 artistë e punonjës të TKOBAP”.
“Ashtu siç e kishim premtuar kohë më parë bashkë me rinovimin e ambienteve të këtij teatri vjen edhe rritja e pagave. Patjetër me bindjen tonë se artistët meritojnë më shumë, sidomos pas një periudhe të vështirë që kaluan si pas rikonstruksionit edhe gjatë pandemisë. Në bazën e këtij vendimi janë 190 artistë të këtij institucioni që përfitojnë një rritje page nga 46 deri 59% dhe 191 punonjës ata të cilët do të kenë një rritje deri në 15%”, theksoi Margariti.
Ministrja Margariti u shpreh se “është një vendimi rëndësishëm, një hap më tepër për të motivuar, nxitur, nivelin artistik, jo vetëm të teatrit, por të gjithë sektorit tonë dhe padyshim është një rrugëtim që po punojmë ta vazhdojmë edhe në të tjera institucione,
kemi plot kantiere kulture të hapura, edhe në pjesën e reformave duhet të përfshihen edhe punonjësit tanë”.
“Jemi të aftë për të treguar se dimë të mbajmë fjalën dhe po mbështesim sektorin në këtë moment krize që po kalojmë të gjithë”, përfundoi Margariti.
