Promovohet në Prizren vepra e re poetike e Mustafa Baljes „Sazviježđe nestale zemlje“ (Yjësia e tokës së zhdukur)
KULTURA E KUJTESËS SI MBROJTJE NGA HARRESA
Nga Restelica e deri në Srebrenicë, Balje shkruan „transverzalen e dëshmorëve“ duke e shndërruar dhimbjen në art dhe amanet për gjeneratat e ardhshme
Në ambientet e Institutit „Yunus Emre“ në Prizren, u mbajt promovimi i vëllimit të gjashtë poetik të autorit Mustafa Balje, me titull „Sazviježđe nestale zemlje“ (Yjësia e tokës së zhdukur). Ky aktivitet kulturor, i cili mblodhi shkrimtarë, kritikë dhe dashamirë të fjalës së bukur, u vlerësua si një moment i rëndësishëm i kulturës së kujtesës dhe identitetit.
Moderatorja e mbrëmjes, mr. Džulizarka Mislimi, profesoreshë e gjuhës dhe letërsisë boshnjake, vuri në dukje se vargjet e Baljes dëgjohen në gjuhën boshnjake, turke dhe shqipe, duke e cilësuar autorin si një roje të gjuhës dhe bashkëjetesës. Ajo theksoi se titulli i librit dhe nëntitulli i tij shtrojnë pyetjen thelbësore: „Deri kur të vdekurit do t’i përcjellin të gjallët?“.
Dr. Sadik Idrizi, njohës i mirë i krijimtarisë së autorit, e përkufizoi punën e Baljes si një „perpetuum mobile të vdekjes“, por edhe si një fitore mbi të. Ai shpjegoi se përmbledhja është e strukturuar në tri cikle: „Zapis iz babovine“ (Shënime nga babai/vendlindja), i cili harton kronologjinë e vuajtjeve boshnjake nga Restelica e deri në Srebrenicë; „Iz naručja u gnijezdo“ (Nga krahët në fole), që përfaqëson një dialog intim me rrënjët dhe prindërit; dhe „Podnevni mrak“ (Errësira e mesditës), i cili sjell vizionin e autorit mbi tjetërsimin emocional në botën bashkëkohore. Sipas Idrizit, kjo vepër nuk ofron vetëm interpretime, por riorganizon botën tonë të brendshme.
Gjatë fjalës së tij, autori Mustafa Balje theksoi se ky libër nuk është fryt i dëshirës për lavdi, por një përgjigje ndaj një imperativi etik. Ai u shpreh se përmes këtyre vargjeve dëshiron të ndërtojë një strehë të pathyeshme për kujtesën kolektive, duke mos lejuar që vendet e vuajtjes të mbeten zgjuar të heshtura.
„Nëse për dhimbjen tonë nuk ka më vend mbi këtë tokë të lodhur, e kam ngritur lart – në një yjësi që është e ndritshme, e pashuante dhe e jona,“ përfundoi Balje.
Atmosfera u pasurua me video-materialet „Imena u tišini“ (Emrat në heshtje) kushtuar dëshmorëve të Restelicës, „Sakupljač kostiju“ (Mbledhësi i eshtrave) kushtuar Srebrenicës, si dhe video-materialin për këngën titullare „Sazviježđe nestale zemlje“ (Yjësia e tokës së zhdukur), kushtuar krimit në Shahoviqi pranë Bijelo Poljes.
Libri është ilustruar me veprat e piktorit të mirënjohur Safet Zec dhe është botuar nga shtëpia botuese „Utilis“.
Mustafa Balje u lind në Restelicë në vitin 1967 dhe është anëtar i Shoqatës së Shkrimtarëve të Kosovës (LSHK), PEN Qendrës së Kosovës dhe Shoqatës së Shkrimtarëve Boshnjakë (BDP) me seli në Sarajevë. Ai ka një karrierë të gjatë në gazetari dhe letërsi, duke botuar libra si „Leptiri po pločnicima“ (Fluturat mbi trotuare), „Otok od živog srebra“ (Ishulli i zhivës) dhe romanin historik „Kazivanja Velikog leptira“ (Rrëfimet e fluturës së madhe). Krahas këtyre veprave, autori ka publikuar kohët e fundit edhe përmbledhjen me poezi në gjuhën shqipe „Me gjuhën e zemrës po të flas…“, ndërsa aktualisht është duke punuar në dorëshkrimin e romanit të tij të ri me titull „Osam ključeva“ (Tetë çelësat).
ObserverKult
