Aktorja e njohur e Teatrit të Shkupit, Silvana Bajçinovci, u nda nga jeta, ndërsa do të ngelet në kujtimet e atyre që e kanë parë të luaj në skenën e teatrit. Lajmin për ndarjen nga jeta e ka kumtuar edhe teatri amë.
E ndjera ka lindur në Stari Tërg të Mitrovicës, në vitin 1955 ku e ka kryer shkollën fillore dhe të mesme. Qysh si e vogël ka treguar prirje dhe talent për artin skenik dhe ka marrë pjesë në shfaqje të nxënësve dhe në manifestime të ndryshme kulturore duke qenë gjithnjë në qendër të vëmendjes së publikut.
Në Teatrin e Kombësive në Shkup, Teatri Shqiptar ka ardhur në cilësinë e aktores profesioniste në vitin 1975. Ka luajtur mbi 80 role ndër të cilat mbi 30 role kryesore.
Deri në fundin e viteve të 80-ta ka qenë yll i Teatrit të Kombësive ndërsa pas tragjedive të rënda familjare është tërhequr dhe ka luajtur kohë pas kohe.
Ndër rolet kryesore më të cilat ka mbetur në kujtesë të paharrueshme dhe në kujtesën historike të shënuar në monografitë e skenës teatrore janë: Sanija te ‘’Bashkëshortët ‘‘ e Muharrem Qenës, Antigona në tragjedinë ‘’Antigona’’ të Sofokliut, Fatimja e bukur në shfaqjen ‘’Zbutësit e njerëzve me sy zymyridi’’ të Teki Dervishit, ‘’Nita’’ në shfaqjen e Josip Relës, ‘’Berta’’ në shfaqjen ‘’Anija e vjetër’’ e Resul Shabanit. Pastaj Kafsha në shfaqjen ‘’Pahintikë në ëndërr’’ të Xhabir Ahmetit, E fejuara në shfaqjen ‘’Mblesëria’’ të Çehovit si dhe shumë role tjera për të cilat nëse keni qenë dëshmitarë, ftoheni ta pasurojmë biografinë e kësaj aktoreje me qëllimin që kur të kërkohet emri i saj në ‘’google’’ të shfaqen të paktën disa rreshta për të.
Silvana Bajçinovcin kritika e cilësonte si aktore të sofistikuar në të gjitha elementet e artit teatror. Si për nga loja, gjesti, aftësia e transformimit, për nga mënyra e artikulimit të fjalës artistike, zëri melodik, krijimi i raporteve me partnerët dhe impaktit me publikun lë mbresa të jashtëzakonshme. Ka qenë njëra ndër aktoret që ka lënë gjurmë në artin skenik të Maqedonisë dhe të hapësirave të ish- Jugosllavisë.
Për punën e suksesshme ka marrë çmime të nivelit jugosllavë dhe republikan. Është nga aktoret e para që në atë kohë kur e kërkonte roli shfaqej’’ topless’’.
Teatri Shqiptar i Shkupit shkruan:
”Të pikëlluar tej mase ndajmë me kolegët dhe publikun lajmin e hidhur për ndarjen nga jeta të aktores Silvana Bajçinovci.
Për shkak të rrethanave – pritjes së familjarëve nga jashtë shtetit, informacion rreth varrimit do t’ju japim sot (05.04.2024).
Ndonëse viteve të fundit ikte nga takimet me njerëzit, kurrë nuk i ndali takimet me Teatrin e saj.
Do të jetë gjithmonë pjesë e tij!”
Për të bukurën Silvanë jeta nuk qe fare e lehtë. I mbylli sytë përjetësisht, në moshën 69 vjeçare në Shkup. Qoftë i përjetshëm kujtimi për të!/ portalb.mk
ObserverKult
Lexo edhe:
NDËRROI JETË AKTORJA E NJOHUR, MARGARITA LOZANO
Ajo ishte 91 vjeç dhe konsiderohej “spanjollja e kinemasë italiane”
Margarita Lozano konsiderohej në Spanjë si një aktore e aftë për të interpretuar më së miri një seri rolesh të shumta, në teatër dhe kinema.
Lozano ishte një artiste e madhe, si para publikut teatror ashtu edhe para kinemasë. Margarita Lozano ishte në gjendje të pushtonte Italinë dhe Spanjën me damarin e saj artistik. Ajo madje u cilësua si ‘hipnotike’ nga shtypi i vendit të saj.
Margarita lindi 91 vjet më parë në Tetuán, protektorati spanjoll në Marok, ku ishte transferuar babai i saj ushtarak. Ajo ishte rritur pranë Murcias, në Lorca, në Spanjën juglindore, transmeton ‘lapsi.al’.
Tekstin e plotë mund ta lexoni KËTU:
ObserverKult
