Nipi zbulon amanetin e Lefter Çipës…

Është ndarë nga jeta në moshën 79-vjeçare poeti vlonjat, Lefter Çipa. Poeti ka ndërruar jetë ditë më parë pas një beteje të gjatë me një sëmundje të rëndë. Ai ka lënë pas një krijimtari të gjerë në libra e tekste këngësh.

Nipi i tij, Akri Çipa, tha se “puna e Lefterit na ka ushqyer me dashuri për poezinë, për këngën shqipe”.

Shuhet në moshën 79-vjeçare poeti i njohur/ Nipi zbulon

Akri shton se me gjyshin ka patur një lidhje me zhvillim të veçantë. “Ka qenë i sertë dhe kur isha i vogël e kisha “frikë”, por më vonë kuptova vlerën, valencën e tij shpirtërore dhe artistike. Krijuam një marrëdhënie shumë të afërt si në anën artistike ashtu edhe personale”, tha nipi i të ndjerit për ‘Top Channel’.

Akri vijoi duke thënë se ikja e tij është një “humbje e madhe për mua, familjen dhe gjithë dashamirësit e tij”.

Gjithashtu nipi rrëfen se si ka qenë gjendja e tij shëndetësore së fundmi. “Për fat të keq ka qenë një periudhë e vështirë, ku ka patur dhimbje fizike. Por ka qenë i qartë dhe i kthjellët edhe në momentet e tij të fundit. Që në fëmijërinë time të hershme e mbaj mend gjyshin vetëm duke shkruar. Edhe në këtë javë të fundit, doli publikimi i tij i fundit më 14 shkurt, me rastin e ditëlindjes sime”, tha ai.

Akri tregoi edhe amanetin e gjyshit. Sipas tij, Lefteri ka kërkuar që të varrosej në Pilur.

“Ka qenë shumë i lidhur me vendlindjen e tij. Jetoi jetën ashtu siç ai donte, ishte një person me shpirt artisti. Ishte krenar për familjen e vet, fisin dhe gjithë miqtë e tij që i vlerësoi shumë. Mendoj se iku pa asnjë brengë”, përfundoi nipi./(top channel)