![albin kurti](https://observerkult.com/wp-content/uploads/2024/05/albin-kurti-696x394.png)
Kryeministri i vendit, Albin Kurti mori pjesë në hapjen e edicionit të 21-të të Javës së Bibliotekës, e cila është mbajtur në hapësirat e Bibliotekës Kombëtare të Kosovës.
Kryeministri Kurti gjatë fjalimit të tij tha se si aktivitet qendror i rikujtimit të përvitshëm të rëndësisë së bibliotekës dhe librit, këtë vit programi i saj është tejet përmbajtësor.
“Ekipet e zellshme të Bibliotekës Kombëtare, së bashku me organizatat e kulturës dhe të trashëgimisë kulturore, si dhe profesionistët e intelektualët e Kosovës, e ata të huaj, do të na tregojnë punën e tyre të shkëlqyer disa vjeçare. Ne do të kemi mundësinë të shohim rezultatet e përpjekjeve të tyre të palodhura. “, theksoi Kurti.
Më tej, kryeminsitri Kurti tha se hapësirat e çdo institucioni të kulturës dhe trashëgimisë tonë do të kenë qasje të lehtë fizike.
“Çdo qytetar i Republikës, me Qeverinë tonë duhet të ketë qasje në trashëgiminë e shkruar, qasje të barabartë për secilin individ në thesarin e Bibliotekës Kombëtare”, tha ai.
Të pranishëm në këtë ngjarje ishin dhe ministri i Kulturës, Rinisë dhe Sportit, Hajrulla Çeku, ambasadori i Republikës së Shqipërisë në Kosovë, Petrit Malaj, profesorë e përfaqësues të institucioneve të kulturës, dhe pjesëmarrës të shumtë adhurues të librit e të artit, të cilët u mirëpritën nga u.d. drejtore e Bibliotekës Kombëtare, Bukurije Haliti, si dhe anëtarë të tjerë të stafit të Bibliotekës Kombëtare të Kosovës.
Ndryshe, Qendra e digjitalizimit filloi me ruajtjen e gazetës “Rilindja” dhe me koleksionet e rralla dhe të vjetra, e do të vazhdojë edhe më tutje me koleksione dhe artefakte të tjera. Të gjitha këto dhe më shumë do të jenë të qasshme për të gjithë publikun deri më 2 qershor.
Fjalimi i plotë i kryeministrit të Kosovës, Albin Kurti:
I nderuari, z.Hajrulla Çeku, ministër i Kulturës, Rinisë dhe Sportit,
I nderuari, z.Petrit Malaj, ambasador i Republikës së Shqipërisë në Kosovë,
E nderuara, ushtruese e detyrës, drejtore e Bibliotekës Kombëtare, znj. Bukurije Haliti,
E nderuara, znj. Patricia Nugee, profesioniste dhe koleksioniste e literaturës,
E nderuara, znj. Blerta Ismajli, anëtare e Këshillit Drejtues të Bibliotekës Kombëtare të Kosovës,
I nderuari, z. Liridon Zekaj, udhëheqës i Bibliotekës Digjitale,
I nderuari, profesor Arsim Sinani, nga departamenti i Antropologjisë në Fakultetin Filozofik të Universitetit të Prishtinës,
I nderuari, z.Alban Morina nga CHëB Kosova, trashëgimia kulturore pakufij
Të nderuar përfaqësues të institucioneve të Kulturës, profesorë e studentë,
Të nderuar artdashës, adhurues të librit,
Sot jemi mbledhur për të kremtuar disa prej shtyllave të demokracisë sonë: barazinë, qasjen e hapur për të gjithë dhe ruajtjen e vlerave njerëzore. Këto janë themelet që na udhëheqin dhe që forcojnë shoqërinë tonë. Java e Bibliotekës në Kosovë po nis për herën e 21-të. Si aktivitet qendror i rikujtimit të përvitshëm të rëndësisë së bibliotekës dhe librit, këtë vit programi i saj është tejet përmbajtjesor.
Ekipet e zellshme të Bibliotekës Kombëtare, së bashku me organizatat e kulturës dhe të trashëgimisë kulturore, si dhe profesionistët e intelektualët e Kosovës, e ata të huaj, do të na tregojnë sot punën e tyre të shkëlqyer disa vjeçare. Ne do të kemi mundësinë të shohim rezultatet e përpjekjeve të tyre të palodhura.
Së pari, do të vizitojmë Qendrën e Digjitalizimit të Bibliotekës Kombëtare. Kjo qendër është një dëshmi e përkushtimit tonë për të ruajtur dhe mbrojtur trashëgiminë tonë kulturore për brezat e ardhshëm që do vijnë pas nesh. Pastaj, do të ndjekim përurimin e projektit “Qasje për Personat me Aftësi të Kufizuara” me menaxher të programit, Alban Morinën, nga Fondacioni për trashëgimi kulturore pa kufij në Kosovë. Ky projekt ka krijuar hapësira me qasje për personat me aftësi të kufizuara në objektin e Bibliotekës Kombëtare të Kosovës, duke siguruar që çdo individ do të ketë mundësi të barabarta për të shfrytëzuar burimet e përbashkëta.
Një tjetër ngjarje e rëndësishme është ekspozita “Kujtesa për Skënderbeun” me koleksionin e librave antikuar të koleksionistes britanike, Patricia Nugee. Kjo ekspozitë na rikujton rëndësinë e ruajtjes së historisë sonë dhe lidhjet e saj me trashëgiminë botërore.
Mbi gjysmë milion euro të fondeve të Qeverisë Kosovës janë dedikuar për digjitalizimin e shërbimeve të Bibliotekës Kombëtare të Kosovës, digjitalizim ky i cili ndodh nëpërmjet Qendrës për Digjitalizim dhe Platformës së Bibliotekës Digjitale. Deri më tani, janë digjitalizuar rreth 600 mijë objekte digjitale, përfshirë gazetën Rilindja dhe koleksionet e rralla e të vjetra. Digjitalizimi i këtyre materialeve është thelbësor jo vetëm për qasjen e lehtë në informacion, por edhe për ruajtjen e njohurive dhe të historisë sonë nga shkatërrimi apo harresa.
Djegia dhe shkatërrimi në dorë të aksidenteve ose të regjimeve totalitare nuk kanë pasur mundësi t’i mbrojnë këto materiale. Populli ynë ka punuar për t’i prodhuar dhe përmbledhur këto materiale, dhe digjitalizimi i tejkalon rëndësinë që ka për qasjen e lehtë të informacionit. Ai padyshim e bën më të lehtë, por ka rëndësi në ruajtjen e informatave, diturive dhe njohurive për shekuj të historisë dhe të kulturës sonë, duke siguruar që harresa kurrë të mos jetë një opsion.
Qeveria jonë ka prioritet ruajtjen e kujtesës si bazë e vetëdijes sonë kombëtare. Kujdesi për çdo cep të Kosovës është një vlerë e pandashme me jetën tonë të përditshme, edukatën dhe filozofinë e të jetuarit në këtë vend. Synimi ynë është arritja e barazisë shoqërore, dhe digjitalizimi është një mjet kyç për këtë, duke ofruar qasje të barabartë për të gjithë në informacion, infrastrukturë fizike dhe njohuri.
Vitin e kaluar, kemi arritur një sukses të madh duke lidhur 100% të territorit të Republikës sonë me internet brez gjerë. Kjo arritje na vendos në mesin e 8-të top shteteve evropiane, krahas Zvicrës dhe vendeve nordike, dhe shumë përpara rajonit tonë. Tani, çdo qytetar i Republikës së Kosovës ka qasje në arkivat digjitale, një burim i paçmuar për edukimin dhe zhvillimin e mëtejshëm.
Qeveria e Republikës së Kosovës ka prioritet ruajtjen në funksion të kujtesës, barazinë si standard të pathyeshëm dhe qasjen e hapur nëpërmjet digjitalizimit. Kjo nuk është vetëm për hir të transparencës, por për të mirën e çdo qytetari të Kosovës, brenda dhe jashtë vendit, për ta ndier Kosovën si plotësisht të vetën dhe vetën si plotësisht të Kosovës.
Ju faleminderit!
ObserverKult
![](https://observerkult.com/wp-content/uploads/2024/03/Albin-Kurti-ne-Teatrin-Dodona.png)
Lexo edhe:
ALBIN KURTI NDOQI NJË SHFAQJE FRANCEZE NË TEATRIN “DODONA”, THOTË SE LIDHJA MES DY VENDEVE DËSHMOHET FUQISHËM
Kreu i Qeverisë së Kosovës, Albin Kurti së fundmi ishte në Teatrin “Dodona” për të ndjekur shfaqjen franceze “B+B=BB”, e cila po shfaqet në kuadër të hapjes së javës së Frankofonisë “ATMOSPHERES”.
Këtë e ka bërë me dije përmes një njoftimi në rrjetet sociale vet kryeministri Kurti.
Me këtë rast, Kurti tha se edhe njëherë lidhja jonë me Francën dëshmohet fuqishëm dhe ngjarje kulturore si kjo krijojnë ura të reja në mes të skenave, institucioneve dhe komuniteteve tona të përbashkëta artistike.
Tekstin e plotë mund ta lexoni KËTU:
ObserverKult