Shqipëria ka nisur përgatitjet për organizimin e festivalit të këngës, që në dhjetor do të shënojë edicionin e 59-të.
RTSH ka konfirmuar sot se pavarësisht situatës së krijuar nga koronavirusi është e sigurt se edhe këtë fundvit eventi më i madh i këngës në vend, do të mbahet, transmeton zeri.info.
Nëndrejtori i Përgjithshëm i RTSH-së, Martin Leka zhvilloi sot takimin e parë konsultativ me krijuesit, që kanë lënë gjurmë në këtë festival, muzikantë e tekstshkrues.
Në takim siç raporton RTSH-ja, u diskutuan çështje që lidhen veçanërisht me cilësinë e festivalit, duke nisur që nga ngritja e një komisioni vlerësimi për përzgjedhjen e këngëve e deri tek kriteret për pjesëmarrjen në festival.
Në muajin shtator pritet që krijuesit të paraqesin këngët që do të përzgjidhen për edicionin e 59-të Këngës në RTSH, ku fituesi që nga viti 2004 përfaqëson Shqipërinë në festivalin evropian të këngës “Eurovision”, i cili u anulua sivjet për shkak të pandemisë.
