Më 24 shkurt 1871 lindi Sevasti Qiriazi Dako, arsimtare, veprimtare e çështjes kombëtare.
Ishte atdhetare dhe nismëtare e organizimit të arsimit shqiptar për gra. Naim Frashëri ishte ai që i dha mundësi Sevasti Qiriazit të studionte në kolegjin me emër “Robert Kolegj” në Stamboll e të luante një rol aktiv në arsimimin e grave.
Ajo qe e para grua shqiptare që studioi në këtë institucion amerikan, të cilin e kreu në qershor 1891. Me t’u kthyer në Shqipëri, Sevastia mori pjesë në ngritjen e shkollës së vashave, në Korçë, më 1891.
Motrat Qiriazi ishin mësueset dhe edukatoret e para të shkollës së vashave nga e cila dolën shumë emra të njohur, që kontribuuan, jo vetëm në fushën e arsimit, por u bënë edhe luftëtare të njohura të çështjes kombëtare. Kjo shkollë është edhe fillimi i një shkolle mbi baza laike.
Pas Luftës së Parë Botërore, kjo shkollë njihej ende me emrin e familjes Qiriazi. Sevasti Qiriazi mori pjesë edhe në Kongresin e Manastirit, ku u mor kryesisht me përgatitjen e teksteve shkollore.
Me të shoqin, gazetarin dhe shkrimtarin Kristo Anastas Dako e me të motrën Parashqevi ajo vajti në Rumani e prej andej emigroi në Shtetet e Bashkuara, ku bashkëpunoi me të përdyjavshmen “Yll’ i mëngjesit”. Vdiq më 30 gusht të vitit 1949./ATSH
ObserverKult
Lexo edhe:
SEVASTI QIRIAZI, NJË NGA GRATË ME MË NDIKIM TË BOTËS SHQIPTARE
Kryeministri i Shqipërisë e kujtoi sot, Sevasti Qiriazin, e cila ndërroi jetë më 30 gusht 1949.
“Sevastia, motër e Parashqevisë, Gjergjit e Gjerasimit, bashkëshorte e Kristo Dakos, atdhetarit me plot merita, iu bë Shqipërisë dhe shqiptarëve një lloj “mëme mëkuese” e parimeve të jetës kombëtare dhe e primatit të gjuhës shqipe”, tha Rama ndër të tjera në postimin në Facebook.
Tekstin e plotë mund ta lexoni KËTU:
ObserverKult
