![panairi panairi](https://observerkult.com/wp-content/uploads/2024/07/panairi.png)
Edicioni i XVI-të i Panairit të Librit në Prizren që organizohet nga Instituti për Kulturë dhe Kërkime Sociale do të hapet të mërkurën mbrëma, dhe në të do të marrin pjesë shtëpi botuese nga Kosova, Shqipëria, Maqedonia e Veriut dhe Turqia.
Si zakonisht, ky panair organizohet në ambient të hapur, te Sheshi i Lidhjes, ndërkohë që promovimi i librave do të realizohet në Kej, në orët e mbrëmjes dhe atë në dy terminë prej orës 20:00 respektivisht 20:45, raporton Telegrafi.
“Secilën mbrëmje të Panairit do të ketë mbrëmje letrare në Kej, buzë Lumbardhit, ku do të promovohen shkrimtarë e studiues nga Prizreni, Prishtina, Tirana, Shkupi, Durrësi dhe Mitrovica”, ka bërë të ditur përgjegjësi i Programit Letrar të Panairit të Librit në Prizren, Ditar Kabashi.
Sipas tij, autorët që do të përurojnë veprat e tyre janë: Adil Olluri, Roland Spahiu, Qerim Lita, Merita Kuçi, Skënder Zogaj, Xhevair Lleshi, Fjolla Spanca, Engin Noyan dhe Donika Dabishevci, derisa një orë letrare do t’i kushtohet veprimtarisë artistike të shkrimtarit të ndjerë, Haqif Mulliqi.
“Me këtë program, dashamirët e librave do të kenë mundësi të dëgjojnë trajtime e diskutime nga proza, poezia, historia, etj”, ka thënë Kabashi.
Mbrëmjet letrare do të drejtohen nga Ditar Kabashi dhe Osman Goranci.
Edicioni i XVI-të i Panairit të Librit në Prizren, mbështetet nga Komuna e Prizrenit dhe MKRS, dhe do të mbahet deri më datën 28 korrik 2024.
ObserverKult
![](https://observerkult.com/wp-content/uploads/2024/07/2dd-724x1024.jpg)
Lexo edhe: