Ministria e Kulturës dhe Turizmit e Kosovës u bën thirrje qytetarëve të Gjakovës të marrin pjesë në një takim dhe ekspozitë, që organizohen në kuadër të projektit për hartimin e Planit të Konservimit të Tërësisë Urbanistike “Çarshia e Madhe”.
Aktiviteti synon të mbledhë kujtimet, përvojat dhe kontributin e qytetarëve për identifikimin e vendeve dhe shënjuesve më të rëndësishëm në qytet, në lagje dhe komunitete të ndryshme.
Në të njëjtën kohë, ekspozita e fotografive do të sjellë një pasqyrë të zhvillimit të Gjakovës ndër vite, duke paraqitur shpërndarjen hapësinore sipas funksioneve dhe marrëdhënien e banorëve me mjedisin fizik.
Takimi dhe ekspozita do të mbahen më 27 mars 2026, nga ora 10:00 deri në 16:00, në Galerinë e Arteve në Pallatin e Kulturës dhe janë të hapura për të gjithë qytetarët.
Ky projekt, i realizuar në bashkëfinancim me Ministrinë e Kulturës dhe Turizmit dhe me mbështetje teknike nga UN-Habitat Kosovë, synon integrimin e trashëgimisë kulturore në planifikimin hapësinor, për një zhvillim të qëndrueshëm, të gjelbër dhe gjithëpërfshirës.
ObserverKult
Lexo edhe:
