Aktori i “Fast & Furious”, Vin Diesel, ka debutuar me këngën e tij të parë të titulluar “Feel Like I Do” në bashkëpunim me producentin nga Norvegjia, Kygo.
Vin njëherësh ka promovuar këngën në emisionin “The Kelly Clarkson Show”, pasi u lansua në Spotify dhe Apple Music të premten.
Kënga u publikua në labelin e Kygos, “Palm Tree Records”, me Diesel që e quajti DJ-në si ‘një prej njerëzve që ka besuar që nga fillimi tek ai’.
Diesel po ashtu ka bërë një video të shkurtër për Clarkson, përmes të cilës tregoi se si ka ecur kjo këngë e re.
“Jam shumë i nderuar të debutoj me këngën time në shoun e juaj pasi qysh kur ke fituar “Idol”, je akoma po e njëjta që ke ruajtur origjinalitetin”, tha ai. “Unë natyrisht në këtë vit nuk mund të jem në ndonjë xhirim të filmit, siç e dini që është e pamundur, por kam një gjë tjetër kreative. Një gjë tjetër që unë e ndaj prej zemrës”.
Në një postim në faqen e tij zyrtare në Instagram, Vin Diesel shtoi: “Për një kohë të gjatë, ju kam premtuar që do të publikoj këngë të re, i inkurajuar nga ju, të bëj gjëra të tjera”.
Më herët, fansat e kanë parë atë duke interpretuar këngë të Rihannas, Sam Smith, Beyonce dhe Bill Withers./Telegrafi
