Viola Gjylbegaj është e vetmja pedagoge shqiptare në Universitetin e Abu Dabit. Që prej vitit 2011 ajo jeton në Emiratet e Bashkuara Arabe ku ka krijuar dhe familjen.
Në një intervistë për gazetarin Andri Xhahu në emisionin “Në radio”, Gjylbegaj tregon se si u gjend në këtë qytet të largët të Lindjes së Mesme.
Pasi mbaroi “Shkollën pedagogjike” në Elbasan, studioi për Gjuhë e Letërsi Angleze dhe Gazetari në Universitetin “La Sapienza” të Romës.
“Më pas aplikova për doktoraturë në Universitetin e Tor Vergata-s në Itali. Aty njoha dhe bashkëshortin, i cili është arab.
Ai vazhdonte masterin për financë. Patëm një lidhje të shkurtër, gati katër muaj, sepse masteri i tij po përfundonte.
Ideja ishte që të shkonte në Emiratet e Bashkuara Arabe për të kërkuar punë dhe më pas të shkoja tek ai kur të mbaroja doktoraturën.”
Gjatë kohës së doktoraturës në Itali, Gjylbegaj nisi të aplikojë online nëpër shkolla të ndryshme në Emiratet e Bashkuara.
“Më erdhi shumë çudi kur isha në Itali dhe bëra intervistën e punës përmes telefonit.
Mbaj mend që drejtori i një shkolle private më thotë: “A do të bëhesh drejtuese e Departamentit të Anglishtes?” Pranova!
Të nesërmen më dërguan vizën, ofertën e punës, detajet e rrogës, përfshirë edhe shtëpinë.”
Duke qenë se Gjylbegaj kishte gradën e doktorit, vendos të aplikojë në disa universitete. “Kur aplikova në Universitetin Abu Dabi, shefi i departamentit që më intervistoi qëlloi të ishte nga Kina.
Mbaj mend që kur po bëja intervistën me të, më tha: “E di pse të kam zgjedhur për këtë intervistë? Sepse Kina dhe Shqipëria janë miq.”
Që nga viti 2012, Viola Gjylbegaj është pedagoge në Universitetin e Abu Dabit, në Kolegjin e Arteve dhe Shkencave, departamenti i Komunikimit Masiv.
“Aty mësohet për radio dhe televizion, produksion medieje dhe komunikim strategjik, dega ku jap unë mësim, në të cilën futet gazetaria e shkruar dhe marrëdhëniet publike.”
E pyetur se si e bën të ndihet fakti që është e vetmja pedagoge shqiptare në këtë universitet dhe a është shikuar ndryshe, Gjylbegaj përgjigjet: “Ndihem shumë krenare. Të qenit shqiptare nuk më ka penguar.
Këtu e shikojnë Europën me shumë dashuri. Duan që njerëzit nga Europa të vijnë të punojnë në këtë anë të botës.”
Viola Gjylbegaj është autore librash dhe shkrimesh shkencore. Gjithashtu ka sjellë edhe shumë libra në shqip.
Ajo kujton se përpara se të shkonte në Abu Dhabi, me paratë e përkthimit të librit “Fuqia e së tashmes” mundi të shkonte 10 ditë në Dubai për të takuar atë që sot është bashkëshorti i saj.
Ky ishte takimi i parë pas një viti që qëndruan larg njëri-tjetrit për shkak të studimeve për doktoraturën.
Bashkëshorti i Gjylbegajt është arab nga Palestina. Bashkë kanë dy fëmijë, Adami, 7 vjeç e gjysmë dhe Xhulia, 3 vjeçe e 8 muaj./rtsh
ObserverKult
Lexo edhe:
ITALIA NDERON PEDAGOGEN SHQIPTARE ME ÇMIMIN SHKENCËTARJA MË E MIRË NË EUROPË
Një lajm i mirë vjen përtej detit, Italia në një garë mes rradhëve të shkenctarëve, ka shpallur një shqiptare si shkencëtarja më e mirë në Evropë
Ornela Dardha është shkencëtarja shqiptare, që është lektore e lartë në shkencat kompjuterike në Universitetin e Glasgow. Ajo ka fituar nga qeveria italiane çmimin e madh ‘Science. She says’, duke u vlerësuar si “Shkencëtarja e re me arritje personale të jashtëzakonshme”.
Në një lidhje me Skype për “ABC e Mëngjesit”, Ornela ka treguar se çmimi u dha nga Ministria e Puneve te Jashtme të Italisë, ku mes femrave nga e gjithë bota, u zgjodh më e mira në Evropë.
Tekstin e plotë mund ta lexoni KËTU:
ObserverKult
