Manifestimi tradicional “Vjeshta letrare e Gjilanit 2026”, këtë vit do të zhvillohet nga 17 tetori deri më 19 dhjetor. Përgjatë kësaj periudhe janë paraparë nëntë ngjarje, që përfshijnë shënimin e përvjetorit të një studiuesi e shkrimtari, diskutime për vepra poetike, prezantime autorësh, një monografi dhe një veprimtari me nxënës.
Programi bashkon autorë të brezave të ndryshëm dhe krijues nga mërgata, ndërsa poezia zë vendin kryesor në një pjesë të konsiderueshme të takimeve. Të gjitha ngjarjet do të mbahen në Bibliotekën “Fan S. Noli” në Gjilan, me fillim në orën 12:00.
Hapja e manifestimit, më 17 tetor, do t’i kushtohet 80-vjetorit të lindjes së prof. dr. Anton Nikë Berishës. Me këtë ngjarje përvjetori nis kalendari i sivjetmë, i cili më pas vijon me takime të përqendruara në libra dhe në krijimtarinë e autorëve të përfshirë.
Më 31 tetor do të zhvillohet diskutimi për përmbledhjen poetike “Mos i kallzo harrimit” të Naim Beqirajt.
Muaji nëntor do të sjellë katër ngjarje. E para, më 7 nëntor, do t’i kushtohet Bardh Frangut, përmes prezantimit të portretit të tij letrar.
Më 14 nëntor do të prezantohen dy vëllimet poetike të Zize Pepshit, e cilësuar në program si krijuese nga mërgata.
Veprimtaria e 20 nëntorit përfshin Shkollën e Mesme të Ulët “Selami Hallaçi” të Gjilanit dhe do t’u kushtohet poezive të zgjedhura të Ymer Elshanit. Pjesëmarrja e shkollës sjell në program edhe nxënësit, duke e lidhur manifestimin me leximin dhe njohjen e krijimtarisë së autorit në mjedisin shkollor.
Më 28 nëntor do të prezantohet monografia “Dy fshatrat e një trungu” e Sabit Rrustemit.
Programi i dhjetorit nis më 5 dhjetor me takimin kushtuar përmbledhjes poetike “Grue prej zjermi” të Donika Dabishevcit.
Më 12 dhjetor, mysafir i “Vjeshtës letrare të Gjilanit” do të jetë shkrimtari Mexhid Mehmeti.
Ngjarja përmbyllëse do të mbahet më 19 dhjetor, nën emërtimin “Me botimet e reja – 2026”. Kështu, kalendari që hapet me shënimin e një përvjetori letrar përfundon me vëmendjen te prurjet e reja botuese.
ObserverKult
