Shkrimtarja ukrainase, Victoria Amelina, ka vdekur pas sulmit rus që goditi një restorant picash në qytetin e Kramatorskit.
Studiuesja e krimeve të luftës, është bërë personi i 13-të që ka vdekur në sulm.
Shoqata e shkrimtarëve PEN Ukraine tha se mjekët “bënë gjithçka që mundën për të shpëtuar jetën e saj, por fatkeqësisht plagët ishin fatale”, shkruan BBC.
Aktivistët e të drejtave të njeriut e kanë quajtur sulmin një krim lufte.
Kramatorsk është nën kontrollin e Ukrainës, por është afër pjesëve të pushtuara nga Rusia të Ukrainës.
Amelina, 37 vjeçe, po darkonte me një delegacion gazetarësh dhe shkrimtarësh kolumbianë në sallën e njohur Ria Lounge kur raketa goditi. Rreth 60 të tjerë u plagosën në sulm.
Ajo u dërgua me urgjencë në spitalin në Dnipro, por nuk u mbijetoi plagëve.
“Me dhimbje të madhe ju informojmë se zemra e shkrimtares Victoria Amelina pushoi së rrahuri më 1 korrik”, thuhet në një deklaratë të grupit.
“Në ditët e fundit të jetës së Viktorias, familja dhe miqtë e saj ishin pranë saj”.
Amelina ishte një nga shkrimtaret e reja më të famshme të Ukrainës, e cila filloi të dokumentonte krimet e luftës pas pushtimit të plotë të Rusisë vitin e kaluar. Ajo gjithashtu filloi të punojë me fëmijët pranë vijës së frontit.
Vitin e kaluar ajo zbuloi ditarin e shkrimtarit për fëmijë Volodymyr Vakulenko, i cili u rrëmbye dhe u vra nga trupat ruse në qytetin e Izyumit menjëherë pas pushtimit.
Libri i saj i parë jo-fiction në anglisht, “War and Justice Diary: Looking at Women Looking at War”, pritet të botohet./gazetaexpress
ObserverKult
Lexo edhe:
