Në Shqipëri jo të gjitha qytetet kanë shkolla muzike dhe fëmijët e talentuar ndjekin klasa të veçanta ku që në moshë të vogël ushtrohen për të ndjekur rrugën e artit, në muzikë, artet figurative, apo balet.
Melisa Figuri, nga qyteti i Lezhës, është një prej tyre. Ajo e ka nisur rrugën e artit që në moshën 5-vjeçare duke zgjedhur violinën dhe me pasionin për muzikën klasike.
Specialistët thonë se ekspozimi ndaj muzikës që në moshat e hershme, zhvillon tek fëmijët aftësi përtej asaj artistike.
Është Melisa Figuri, nxënëse e klasave të muzikës në shkollën “Besëlidhja” në qytetin e Lezhës. Rruga e saj drejt muzikës ka nisur që heret, në moshën 5-vjeçare.
Për gati 8 vite violina është pjesë e pandarë e ditëve të saj dhe tani, kur është në klasën e 6-të, Melisa thotë se adhuron muzikën klasike.
“Ishte pak e vështirë, sepse muzikën klasike nuk ishte se e kisha dëgjuar shumë. Por tashti që e kam kuptuar, muzika është një mjet me të cilin ne mund të shprehim ndjenjat tona. Dhe, mua më pëlqen shumë kur marr violinën në dorë dhe vazhdoj e shpreh ndjenjat e mia sikur ta kem një mik të ngushtë”.
Koncertet tashmë janë pjesë e jetës artistike të Melisës. Koncerti i saj i fundit me muzikë klasike u mbajt pak ditë më parë si pjesë e kalendarit të aktiviteteve kulturore të Lezhës për sezonin veror. Në këtë koncert Melisa ishte me bashkëmoshatarët e saj, Sonila Bushin në piano dhe Fabio Markolaj edhe ai në violinë.
“Kam bërë shumë koncerte me kompozitorë të ndryshëm. Mua më kanë pëlqyer të gjithë. Nuk mund të veçoj ndonjë, sepse të gjithë janë shumë të bukur, si Moxarti, Shostakovich, Vivaldi, etj. Janë shumë kompozitorë të mirë dhe mua më pëlqejnë shumë pjesët e tyre”.
Mësuesja e Melisës, Alesia Sadiku, thotë se autorët klasikë janë të vështirë në interpretim, por Melisa është bashkëpunuese dhe me dëshirën për të zgjeruar repertorin e saj në violinë.
Shqipëria dallohet për numrin e madh të talenteve në fushën e artit si në muzikë, artet figurative apo balet. Mjaft prej tyre vazhdojnë të spikasin në skenat botërore. Vitet e fundit, në shumë qytete funksionojnë shkollat apo klasat e artit, si në Tiranë, Shkodër, Lezhë, Fier, Gjirokastër etj.
Në këto shkolla përgatiten qindra të rinj për të vazhduar rrugën e artit. Mësuesja e muzikës, Alesia Sadiku, thotë se ka një interesim të gjërë të prindërve për t’i dërguar fëmijët në shkollat e artit.
“Muzika është një rrugë e gjatë, e cila ka vështirësitë e veta si në çdo fushë, por normalisht kjo e ndihmon për të përballuar emocionet. Dhe, ku më mire se në skenë mund t’i përballojnë emocionet? Dhe kjo patjetër i ndihmon edhe për arritjet e tyre personale”.
Si të gjithë moshatarët edhe Melisa e ka një ëndërr, ëndërr që ndoshta bëhet ose jo realitet, por gjithsesi do ta çojë Melisën përpara në jetë.
“Do të doja të prekja shumë skena të mëdha botërore dhe të njihesha si një violiniste, e cila filloi qetë dhe vazhdoi fuqishëm”./ ZëriiAmerikës
ObserverKult
Lexo edhe:
“I DETYROI” FRANCEZËT TË KËNDONIN SHQIP/ RED RADOJA FLET EDHE PËR TË ATIN E NDJERË, AKTORIN E NJOHUR GULJELM RADOJËN
Kompozitori e pianisti, Red Radoja, mban në ‘Opera’ një koncert recital në kuadër të Ditës Ndërkombëtare të Frankofonisë.
Artisti rrëfen jetën në Francë, ku promovon dhe muzikën shqiptare, familjen dhe mungesën e të atit, aktorit Guljelm Radojës.
Rikthimet e pianistit e kompozitorit Red Radoja në vendlindje janë gjithnjë e më të shpeshta… Në Ditën Ndërkombëtare të Frankofonisë, pas Korçës e Durrësit, mbajti një koncert recital në ‘Opera’.
Nga Franca ku jeton prej më shumë se dy dekadash, sjell veprat e 6 kompozitorëve. Duke mbërritur deri tek pjesët e tij.
Tekstin e plotë mund ta lexoni KËTU:
ObserverKult
