Nënkryetari i Kuvendit të Shqipërisë, Agron Gjekmarkaj ka reaguar pas ndarjes nga jeta e gjeniut të letërsisë shqipe, Ismail Kadare duke u shprehur se kurrë kultura shqiptare s’ka pasur një të tillë humbje.
“E shihnim si të pavdekshem në fronin e Patriarkut të letrave shqipe e botërore Ismail Kadarenë”, shprehet Gjekmarkaj.
Nënkryetari i Kuvendit shprehet se shkrimtari ishte emancipuesi dhe katalizuesi i kulturës e gjuhës shqipe, duke shtuar se “në kohën e izolimit e ndalimit, na dha famën e krenarinë si një spirancë në Europë”.
Postimi i plotë:
E shihnim si të pavdekshëm në fronin e Patriarkut të letrave shqipe e boterore Ismail Kadarenë. Në fakt edhe pas këtij lajmi që të lë pa frymë i tillë është. Nga sot ai hyn në jetën e pasosun, atë që se njeh më vdekjen.
Ishte emancipuesi dhe katalizuesi i kultures e gjuhës shqipe, kujdestari i epërm i popullit të tij. Në gjithçka madhështor. Në stinën e urisë na dha ushqimim më të mirë shpirtëror, vizionet e lirisë dhe të bukurën.
Në kohën e izolimit e ndalimit, na dha famen e krenarinë si një spirancë në Europe, identitetin e se cilës shumë e desh dhe përkufizoi për shqiptarët e tij. Në kohën e lirisë na këshilloi herë me zemërim e herë më butësi po na mbrojti kurdo e kudo para gjithkujt me librat, përkthimet e pafundme , artikujt çmues, konferencat, intervistat , çmimet prestigjioze , dekoratat , që më shumë se atij i duheshin një vendi që kërkonte të ringrihej. Shkrimtari klasik i qytetërimit modern shkëlqen në çdo librari të Europës e Botës në antologjitë e tyre, si i tillë e si shqiptar. Sot të dy në një bashkohen në përjetësi. Shumë herë e hidhëruam e zemëruam, por të gjithë e lexuam e mësuam prej tij të vetëdijshëm se është i pangjashem, i papërsëritshëm, bir unik i talentit të tij. Kurrë kultura shqiptare nuk ka patur një të tillë humbje po kaq të madhe e ka atë familja e perbotshme e letrave. Por as një të tillë trashigimi nga një shkrimtar i vetëm ato se kanë patur.
I dashur Ismail Kadare shqiptar e europian i fisëm, vepra jote në shtepite tona është shpirti, fryma e fjala e shënjtë që do na mbrojë nga marrëzitë tona, që do na mësojë ne dhe fëmijët të shkruajmë e mendojmë bukur, që do na jape motive ekzistenciale për ta dashur këtë vend, do ndriçojnë sa here nata mund të bjere mes nesh dhe Europës që udhën të mos humbasim, po kaq e në mos më tepër në sallonet e kulturës së vërtetë emri yt do na presë tek dera!
E kotë të themi sa na mungon që tani, e kotë të themi që nuk na trondite sa fjalet nuk e shprehin dot!\
ObserverKult
Lexo edhe:
