Filmi i ri fantastiko-shkencor War Machine, me protagonist Alan Ritchson, është bërë aktualisht filmi më i shikuar në platformën Netflix, duke tërhequr vëmendjen e publikut në mbarë botën.
Sipas të dhënave për javën e parë të publikimit, filmi është ngjitur në krye të listës së platformës, duke u kthyer në një nga prodhimet më të ndjekura të momentit.
Kombinimi i aksionit ushtarak me elemente fantastiko-shkencore dhe ritmi i shpejtë i rrëfimit e kanë bërë atë shumë tërheqës për publikun global.
I drejtuar nga regjisori Patrick Hughes, filmi ndjek historinë e një grupi rekrutësh që ndodhen në fazën e fundit të një kampi shumë të ashpër stërvitor për forcat speciale.
Gjatë një ushtrimi përfundimtar në terren, stërvitja e tyre merr një kthesë të papritur kur ata përballen me një kërcënim të panjohur dhe vdekjeprurës nga jashtë Tokës.
Në qendër të ngjarjes është personazhi i interpretuar nga Ritchson, një nënoficer veteran i luftës në Afganistan që vuan nga çrregullimi post-traumatik (PTSD). Ai ka vështirësi të krijojë lidhje me kandidatët e tjerë dhe refuzon të marrë rolin e liderit të ekipit, pavarësisht përvojës së tij. Por kur situata bëhet reale dhe kërcënimi i panjohur shfaqet para tyre, aftësitë dhe përvoja e tij bëhen vendimtare për mbijetesën e grupit.
Ngjarjet intensifikohen kur rekrutët vërejnë një shpërthim të çuditshëm në qiell dhe më pas zbulojnë pranë një përroi diçka që duket si një mjet fluturues i rrëzuar. Zbulimi i tyre shënon fillimin e një përballjeje të rrezikshme me një forcë të panjohur, duke e kthyer stërvitjen ushtarake në një luftë të vërtetë për jetën.
Përveç Ritchson, në film luajnë edhe Dennis Quaid, Stephan James, Jai Courtney dhe Esai Morales, të cilët plotësojnë kastin me interpretime dinamike dhe intensive.
Me skena spektakolare aksioni, atmosferë misterioze dhe një histori që ndërthur dramën njerëzore me kërcënimin nga e panjohura, “War Machine” po konfirmohet si një nga filmat më të komentuar dhe më të ndjekur të momentit në Netflix.
