1. Zogu OTAN
Bombat i krisën 13-të g’zhojat e vove t’ pulës klluqe
Në bodrumin e sh’pisë
çeli veç një zog i bardhë si bora
Të tjerët nuk ishin ngjizë
nga frika e luftës
Dita ditës zogu rritej bashkë me shpresën tonë për mbijetim
ia ngjitëm emnin OTAN e ushqenim me trosha buke e ai me tanë bardhësinë tij
Ne dhe zogu OTAN
për 78 ditë jetuam
duke u shiku sy me sy se cili do të vdes i pari
Në ditën e fundit
kur krismat u ndalën
liria mveshi shpirtnat tanë
Cicërima e tij u shue padiktueshëm…
Saherë të shoh zog pule kujtoj
paralajmëruesin e lirisë për ne të ngujuemit
2. Hana e përgjakun
Për 78 ditë
Hana nuk ndërroj
mbeti e plotë
dhe e përgjakun
E trishtueme
shihte në tokë
maskrat
Dhe nuk e fshihte turpërimin
nga çmenduria
Njerëzore
Pastaj fshihej pas reve
dhe shkrehej në vaj
Derisa vërshoi shiu
i kuq
Ishin lotët e saj që vajtonin
për fatin tonë
3. Dritarja në qershi
Kur tomahovka ra në çerdhe të djallit
As një zog nuk fluturoi qiellit
plluma e sorra bashkë u futën në guvat e frikës
qentë u cijatën si mace
Çdo gja u ngri n’habi
Vetëm Dritarja e shpisë sime fluturoi si dallëndyshe e trembun
dhe u ngjit për degë të qershisë
xhamat e saj u banë pikë e pesë
si bebzat e syve t’mi
që plasën në qindra copë posi bomba
e shpresës
Liria ra prej qiellit
u vizatue në sytë e mi
si dritare e vjerun
në qershi
24 mars (1999-2021)
