Nga Agim Baçi
A dimë ne t’i inkurajojmë sot të rinjtë që ata të guxojnë në jetë të gjejnë vetë rrugën e tyre. Rrugën e tyre drejt një të ardhmeje të moralshme dhe me virtyte?
A jemi të shqetësuar se me çfarë merren sot ata?
A jemi në gjendje të flasim hapur për atë çka i shqetëson dhe për mënyrën se si duhet ta shohin jetën?
Jemi sot në gjendje të mbajmë marrëdhëniet e lidhura mes brezave?
Po të shohim lajmet, po të ndjekim shqetësimet e mësuesve të fëmijëve tanë, mund të kuptojmë shpejt se pothuajse të gjithë jemi dorëzuar pak e nga pak.
Jemi dorëzuar përpara kërkesave të pafundme nga ana e fëmijëve për veshje, për pajisje elektronike, për udhëtime. Pra për teka pa fund, për gjithçka materiale.
Në nxitim të përditshmërisë sonë, shumë pak u flasim atyre për sfidat, për atë që kemi trashëguar nga e kaluara jonë. Ndërkaq, u kërkojmë shumë pak të komunikojnë me gjyshërit, e aq më pak edhe me fqinjët.
Neuropsikologu i famshëm grek, Nikos Sideris, në librin e tij lidhur me komunikimin me fëmijët, vë në plan të parë komunikimin.
Pra komunikimin që duhet të bëjnë prindërit dhe jo psikologët.
Sipas Sideris, janë prindërit ata që duhet t’u tregojnë fëmijëve atë që mundet dhe atë që nuk mundet.
Po ashtu atë që nuk duhet ta kenë, si dhe të jenë gjykues ndaj asaj që shfaqin fëmijët në përditshmërinë e tyre.
“Është e dëmshme për vetë fëmijën, nëse imagjinata e tyre do të diktojë qëndrimin e prindërve”, shprehet Sideris.
Ai kërkon nga prindërit që bashkëbisedimin me fëmijët e tyre ta shikojnë edhe si një bashkëbisedim me veten, si një rritje tjetër.
Sideris vë re në librin e tij, duke iu referuar përvojës si psikolog, se shumë prindër nuk janë të qartë kur u thonë fëmijëve “Mos!”, ose “Jo!”. Kështu e inkurajojnë dyzimin.
Ndërkaq, filozofi spanjoll Fernando Savater sugjeron që t’u mësojmë fëmijëve se pasojat që vijnë nga liria për të vepruar. Ato nuk mund të mohohen apo zhduken sipas qejfit.
Sipas Savater, liria nuk është për të pasur çdo gjë, por për të pranuar pasojat. Në të mirë apo në të keq. Në varësi të asaj që na ka ndodhur apo që nuk arritëm të bënim.
Ky moskomunikim ka bërë që prindërit dhe fëmijët e sotëm të mos diskutojnë asgjë. Madje as ato gjëra, të cilat i prekin çdo ditë.
Apo që do t’i prekin në të ardhmen, sidomos kur të jenë në pleqërinë e tyre.
Duhet ta pranojmë që kjo sfidë nuk është aspak e lehtë. Por, të paktën, ne kemi detyrë t’i inkurajojmë fëmijët që të guxojnë të gjejnë rrugën e tyre. Kjo duke marrë përsipër detyrimet e tyre për një jetë dinjitoze.
T’u mësojmë se të gabosh është njerëzore, por që të kërkosh falje është edhe më njerëzore.
T’u mësojmë se udhëkryqet në jetë merren kur ke një dorë pranë. Kur mundesh që të shohësh tjetrin në sy. Dhe po ashtu kur e kupton që je pjesë e një shoqërie ku ke detyrimet e tua për ta bërë më të mirë.
E sidomos t’u themi se, jeta pa dorën drejt tjetrit rrezikon të ketë pasojë vetëm vetminë dhe zhgënjimin.
ObserverKult
*Titulli i origjinalit: “A dimë ne t’i inkurajojmë fëmijët?”
Lexo edhe:
AGIM BAÇI: “TË THEM DIÇKA BABI? – TI NUK E KUPTON FARE BREZIN TIM!”
Fëmijët, interneti dhe sfida e madhe me talljen e cinizmin!
“Të them diçka babi? – Ti nuk e kupton fare brezin tim!”. Kështu më tha disa kohë më parë im bir, Marini, katërmbëdhjetëvjeçar, teksa i flisja lidhur me efektin e keq që mund t’i shkaktojën kujtdo prej nesh ndjekja e vazhdueshme e videove të pakontrolluara në internet, plot xhirime me provokimeve, ku shfaqet hapur dhuna, tallja dhe seksualizimi i shoqërisë së sotme.
Tekstin e plotë mund ta lexoni KËTU:
ObserverKult
