Vashat nguten me u bâ gra!, poezi nga Arben Prendi
Taka të nalta,
Të holla thikë,
Plagosin trotuarin.
Kalimtarët anojnë kryet të trembun mbrapa.
Asgja, asgja, mos u ligështoni.
Vashat nguten me u bâ gra!
Vashat nguten me u bâ gra,
Kozmetikë, inxhina, sytjene me gjinj dredharakë,
Sjellje perfekte për kryezoja burrash,
Sfidë për lutje.
E natyrshme a e panatyrshme kjo ngutje?…
Nuk e di pse pra,
Vashat nguten me u bâ gra?!
Përqark bubullojnë hapat dhe qeshjet e tyne,
Hapa dhe qeshje enkas për gra,
Kofshë molisëse, trupa sfungjer, krahë,
Lëkundje të prera.
Vashat nguten me u bâ gra!
Trillojnë humbje të rrejshme për lojnat,
Kukulla mistrece,
Macet bishtdredhme,
Xixëllonjat,
Kunorat me lulet e vockla të qershive,
Në një stinë të papërsëritshme.
Kot nguten,
e pamëshirshme âsht koha.
Ah, sa kanë me u pendue!
Ah, sa kanë me u pendue!
ObserverKult
Lexo edhe:
PYETËSORI I PRUSTIT: ARBEN PRENDI
Këtë javë Pyetësorit të Prustit i përgjigjet shkrimtari Arben Prendi
Cila është frika juaj më e madhe?
Nuk e di, në të vërtetë. Ndoshta frika se mos vdes i ri dhe i lë fëmijët të vegjël, pa mbështetje dhe përkujdesje.
Cilin person të gjallë e admironi më së shumti?
Përgjithësisht nuk admiroj askend. Më shumë prirem drejt admirimit të cilësive të veçanta nga njerëz të ndryshëm.
Cili është personaliteti historik më të cilin do të dëshironit të identifikoheshit?
Me asnjë. Secila qenie njerëzore është unike. Secila është e rëndësishme në vetvete. Rrethana të caktuara në jetë nxjerrin në pah cilësitë e karaktereve njerëzore.
Cili është tipari i juaj që nuk e pëlqeni?
Ndoshta natyra pak e mbyllur dhe të mos qenit sistematik në veprimtarinë e përditshme.
Tekstin e plotë e gjeni KETU
ObserverKult
