Prishtina do të mirëpresë sonte dhe nesër ngjarjen kulturore “Ditët e Kulturës së Ulqinit”, të organizuar nga Qendra për Ruajtjen dhe Zhvillimin e Kulturës së Pakicave të Malit të Zi, një aktivitet që synon të ndërthurë artin, traditën dhe lidhjet kulturore mes qyteteve të dy vendeve.
Programi hapet sonte, më 5 nëntor, nga ora 18:00, me ekspozitën e piktorëve akademikë nga Ulqini: Naser Hasa, Bilal Nikezi dhe Edin Kapllani, në Galerinë e Fakultetit të Arteve në Prishtinë. Ekspozita sjell një përzgjedhje veprash që pasqyrojnë frymën e detit, dritën mesdhetare dhe kujtesën e vendlindjes së autorëve.
Ndërkaq, nesër, më 6 nëntor, në ora 19:00, në Amfiteatrin e Teatrit Kombëtar të Kosovës (Pallati i Rinisë), publiku do të mund të shijojë “Koncertin folklorik muzikor të traditës ulqinake”, me pjesëmarrjen e grupeve artistike që ruajnë dhe përcjellin ritmet, këngët e vallet e Ulqinit.
Kjo ngjarje dyditore pritet të sjellë në zemër të Prishtinës aromën e brigjeve të Adriatikut , një takim artistik që kujton se kultura, më shumë se çdo gjë tjetër, i bashkon njerëzit.
ObserverKult
