Ju ftojmë të lexoni një cikël të zgjedhur poezish nga Pem’za Peso:
Blini jem
hej blini jem
kur t‘visha përfaqe
si hanë kulaçe
pa mbaru përqafimi
tana lulat i çelshe prej gëzimi
a e man men
sa here t‘ardhsha nër mriz
hijen ma thejshe n‘mjedis
unë prej atëhere
jam rrëxue shpesh tuj ec symshelë
tuj dashtë me i rue tana pamjet
edhe atë erë
sot m‘je kujtu
renin e ke pas me u zhvesh
o për vjeshtën
o për mu
Dimnat
tinëz ranë
dimën mas dimni
e ma rrafshun stomin e gjinit
bregorja jeme e harrume
që pat nxjerr kry
nër palat e këmishes s‘arrnume
kurgjo s‘tek-o
me t‘metë
dritave t‘synit të zitë e natës
e bardha e borës
mbi flokë
sa zor tek-o
kur t‘ik
pa u hetu
reni i rruzave prej qafës
I dashtuni jem…
I dashuni jem prej letre
t‘palova degermi
e t’fsheha n‘xhep setre
le t‘dokesh si hajmali
Mun me i ra n‘dorë
naj tjetre
që t‘merr për zjerm
t’i djeg gerëm për germë
krejt çka kam shkru
T‘kam fsheh prej syve t‘huj
edhe prej dilli
kur t‘harrojnë krejt
t‘nxjerr n‘ven mindili
Kushedi
naj lot a skej buze
me ty e fshi
Veç gru
Fjet mali me hanën mbi kry
e s‘u dogj
krahëve me qindra zogj
edhe mu nji andërr sa t‘zitë n‘thu
ballit s‘mu shkoq
Ni zog sa troha n‘krahnor
lypka shoq
Fjet mali muluem me borë e s‘u ngri
n’shok‘ e teposhtë u çu dru
Edhe unë ner ethe fjeta
u çova veç gru
Trishtimi i plakut që mbet pa djalë
Ecka Xheka plak shpatit përpjetë
kom mas kome
tuj ia njeh gjyksit ofshamë mas ofshame
tu i bo shuk topat e borës
tu e kqyrë katunin si n’shuplakë t’dorës
e vjerr shikimin n’degë t’qurshisë
ia shihka veç kulmin shpisë
edhe do shoka t’holla tym oxhakut
zunën lotë sytë e plakut
nis kujton rininë bashkë me Kumrinë
kallxo Kumri çka fsheh n’pal’ t’pshtjellakut
kallxoj Xhekës se je tuj thurrë shputa
për komë t’vogla t’buta
lej fjaltë e hallkut po ruju mos t’ngulen shtizat barkut
fort u mallëngjy
tu i zon gujtë përfuni
ungjet mbi kom t’veta
katërdhjetë vjet temas
e shpurth kujtesën
kur e pritke lejlekun
me zon strofull mi plepin
qe ia kish pas mjell baba ktij kur ka le
e qi s’pshtoj pa u pre
s’mlidhen arat si cepat e shamisë
as mali s’i floktë e Kumrisë
thuje Xhekë leje amanetin
me t’shti n’dhe ner qurshi
mos shko i hjekun ner t’dekun
Gishti i dëshirës
Pres biletë udhëtimi
ma shpesh se rroba t‘reja dikurë
dhe kujtohem
në kohën e petkave t‘vjetra
mbi trup t‘ri
kundrave sevdalike gojëshqyer
valixhen me andrra t‘vogla
mbërthyer
edhe në kafën e lehtë kujtohem
që s‘linte gjurmë në filxhan
as fati i rrugëve s’lexohej kjartë
edhpse udhëtimet
bëheshin pa hartë
pres biletë udhëtimi
por asnjë fytyrë e njohur rrugën s‘ma pret
dikur kisha njohur gati një qytet
tashmë llumi i kafes tepron në fund të filxhanit
por gishti i dëshirës
s‘është më i njëjtë
*Pem’zo Peso (Emine Maliqi) ka botuar dy libra me poezi, “Aureola në Pentagram“ nga Klubi letrar “Nositi“, 2010 dhe “Fëmijët e Erës” nga Shtëpia Botuese “Faik Konica” , 2012. Ajo vazhdon të shkruaj poezi, diku afër Alpeve.
ObserverKult
Lexo edhe:
