Që prej se u hap për publikun vitin e kaluar, chatbot-i me Inteligjencë Artificiale, ChatGPT ka mahnitur dhe frikësuar njëkohësisht botën me njohuritë e tij të thella.
Dhe, tani mesa duket po bën të mundur ringjalljen digjitale të të vdekurve në formën e “thanabots”: chatbot-e të trajnuar me të dhënat e të ndjerit.
Zhvilluar nga OpenAI, ChatGPT është një program i fuqizuar nga Inteligjenca Artificiale.
I “mbushur” me më shumë se 300 miliardë fjalë nga të gjitha llojet e burimeve në internet, ChatGPT u përgjigjet kërkesave nga njerëzit duke parashikuar fjalën që duhet të përdorë më pas, bazuar në trajnimin që i është bërë.
Rezultati është një rrjedhë komunikimi që është edhe informative dhe e ngjashme me njeriun. ChatGPT ka kaluar teste të vështira, ka shkruar punime shkencore dhe ka bindur shumë shkencëtarë të Microsoft se në të vërtetë mund të kuptojë gjuhën dhe të përdorë arsyen.
ChatGPT dhe modele të tjera të mëdha gjuhësore mund të marrin gjithashtu trajnime më specifike për të formuar përgjigjet e tyre.
Programuesi Jason Rohrer kuptoi se mund të krijojë chatbot-e që imitojnë njerëz të veçantë duke ushqyer shembujt e ChatGPT se si ata komunikojnë dhe detajet e jetës së tyre.
Ai filloi me Mr. Spock të Star Trek. Më pas, ai lansoi një faqe interneti të quajtur Project December, e cila lejon klientët që paguajnë të futin të gjitha llojet e të dhënave dhe informacionit dhe të krijojnë chatbot-et e tyre të personalizuara, madje edhe ato të bazuara në miq dhe familjarë të vdekur.
Siç detajoi shkrimtari i San Francisco Chronicle, Jason Fagone në një artikull të gjatë të botuar në korrik 2021, rezultati mund të jetë befasues.
Fagone përshkroi përvojën emocionale të 33-vjeçarit Joshua Barbeau, i cili përdori Project December për të bërë një “thanabot” me personalitetin e të fejuarës së tij që kishte vdekur tetë vjet më parë.
Termi thanabot rrjedh nga thanatologjia, studimi shkencor i vdekjes. Leah Henrickson, pedagoge për mediat digjitale dhe kulturat në Universitetin e Queensland, mendon se thanabotët mund të bëhen më të përhapur në dekadat në vijim, pasi njerëzit që ndërrojnë jetë lënë pas një sasi të konsiderueshme të dhënash digjitale, si përmes mesazheve, e-maileve apo postimeve në mediat sociale.
“Këto sisteme mund të krijohen pa pëlqimin paraprak nga i ndjeri, ose mund të përbëjnë pjesë të “planifikimit të pasurive digjitale” ku dikush planifikon ose jep pëlqimin për krijimin e thanabotit të tyre,” shkroi ajo në një punim të botuar në fillim të këtij viti.
Duke qenë se Facebook, Google, Apple dhe Microsoft ruajnë të gjitha grumbullimet e komunikimeve tona digjitale, është e mundur që të gjithë të krijojnë dhe shesin thanabot në vitet e ardhshme.
Duke marrë parasysh që komunikimi me të vdekurit ka qenë një fiksim i vazhdueshëm në të gjitha kulturat njerëzore, ka të ngjarë që do të ketë shumë kërkesa./ a2news.com
ObserverKult
Lexo edhe:
A KA INTELIGJENCA ARTIFICIALE “NDËRGJEGJE”?
Është zhvilluar dhe testuar lista e parë e kontrollit për të përcaktuar nëse një inteligjencë artificiale ka një “ndërgjegje”, por asnjë nga algoritmet aktuale nuk e ka kaluar provimin, madje as ChatGpt.
Propozimi për të përcaktuar një listë të kritereve të dobishme nëse një IA mund të konsiderohet ‘i ndërgjegjshëm’ erdhi nga një grup ndërkombëtar prej 19 neuroshkencëtarësh, filozofësh dhe shkencëtarësh kompjuterikë të udhëhequr nga Patrick Butlin, i Universitetit të Oksfordit dhe Robert Long, i Qendrës për Sigurinë e AI në Kaliforni.
Tekstin e plotë mund ta lexoni KËTU:
ObserverKult
