Ju ftojmë të lexoni një cikël të zgjedhur poetik të Anton Markut:
KËPUCAT E DJALIT
E mbante mend si sot
të njëjtat këpucë i kishte mbathur
ditën e dasmës
Ia kishte blerë ajo
kur i mbushi tetëmbëdhjetë
Të njëjtat i pat
edhe atë të diele
kur u nis, ashtu si për vrap
thuajse po i ikte
vargu i krushqve
livadhit të nuses
Po këmishën e bardhë
ah, këmishën e bardhë
nuk mrrini me e veshë
si atëherë
Pak hapa larg shpisë
ia lidhën duart
para se ta rrzonin
veç me nji plumb
E nana, ajo
krejt çka pau
iu duk andërr
Të nesërmen
iu morën sytë
vdiq edhe vetë
pa i hapun ma
N’xhep të këmishës së zezë
aty ngat zemre
ia gjetën
lidhëset e këpucëve të djalit.
ZEZONË
Në ditët e para të luftës
plakat e mahallës sime
luteshin të mos ishin ma
Nuk donin t’ shihnin
varre t’reja n’shtëpi
Por as dëshira e flaktë për me dekë
nuk kryente punë
Atë vit
bora nuk ia zbardhi
fytyrën dimrit
T’ zezës
iu nxinë sytë
edhe ma shumë.
HISTORI N’VARGJE
Në ditën e tretë te zisë
për lahutarin e fundit në fshat
kryeplaku drodhi nji cigare
e mori gjamën e burrave
Fqinjët u kishin ndihmue
që asnjëherë te mos mbeten
pa armiq
Kishin fjetun
me çorape mbathun
kurrë pa ba nji sy gjumë rehat
n’ besë të tyne.
FAJDEXHIU
Ditën e pazarit
kish ba be
se nuk ka me hi n’dhe
pa i nxjerr
të tana borxhet
Por, kur e kujtonte deken
zvogëlohej e rrudhej
sa nji mi bahej
vetes i hynte n’xhep
Rrnoj pa e dashtë kush
aq sa e pat t’shkrume.
AFERË BJESHKËVE
Era i tha diçka n’vesh
e dimni hangër buzën n’dhamë:
Bora e kish pre n‘besë
tuj ba dashni si e dehun me shiun
Tanë bota jua kish pa
kambët e bardha
kah ecnin majë gishtave
kapun dorë për dore
Një plak n’Malsi
bante be n’kryq t’gurit
se kish folë me ta
Askush nuk i besoi
Bota ishte e zanë
me të tjera pshtjellime.
FQINJA
Nuk e di kush je
as emnin nuk ta di
veç e di se m’ban me u dridhë
sa herë t’shoh n’dritare
veshun sall
me nji kmishë t‘bardhë nate
Daltë çfarë m’dënoftë
t’pushoj sytë
n’ vijën e hollë
mes gjoksit tand
që ndanë
dy ant e botës.
SHAMIA
Kur puthjet t’ harxhohen
e të mos mbesë ma
as dhe nja për be
ke me mbete n’dorë
si shamia e hedhun
nga dora e krushkut
që i vë flakën.
ObserverKult
Lexo edhe:
