Merrmi kryet e vemi në gjoks:
Dua të çlodhem
nga rruga.
Shih si buza udhës m’u poq,
Më fshiku veriu e juga.
Hiç mos më pyet,
ç’ndodhi andej,
Nga brodha poshtë e përpjetë,
Vetëm më lër prehje të gjej
Në gjoksin tënd
të qetë!
Kohë kemi,
do flasim pastaj
Për erëra,
lule,
limonë…
Hesht e kryet në gjoks m’i mbaj,
Flokët ngadalë ledhatomë.
Është i etur
për ledhatim
Ai që baltëra ka çarë,
Ai që ka parë muzg e agim
Dhe duart e rënda ka vrarë.
1964
