Gra të tradhtuara, si numri i vjetër i këmishës,
si vrima e vjetër në rrip të pantallonave,
si jakat e hekurosura me koll.
Gra të tradhtuara që gdhijnë si një sklepë
në buzë të shtratit,
të trembura nga një ëndërr e keqe
samovar që lëshojnë avull
kohë pas heqjes nga zjarri.
Teksa lëvizin diagonal nëpër shtëpi,
këllqet e tyre të buta harkohen ritmikisht
sikur mbllaçitin milingona.
Fëmijët …ah, fëmijët, shkumëzojnë ajrin.
Deri në mbrëmje vonë kapakët prej alumini
kondensojnë mbi nervin e ngordhur të majdanozit,
në supën e paprekur ngjyrëlimoni.
Por ka edhe burra të tradhtuar,
burra të tradhtuar si engjëj të zeshkët,
me shpatulla gjithmonë të rrezikura nga fieret.
Gra dhe burra të tradhtuar
që shpesh e pranojnë fatin ashtu siç ju jepet,
pa e kthyer mbrapsht, fisnikërisht, butë,
siç mund të pranohet uji në një gotë të palarë,
në udhë e sipër…
Gra dhe burra të tradhtuar,
të nisur për një udhëtim të gjatë.
LULJETA LLESHANAKU
*Titulli i origjinalit: Njerëz të tradhtuar
ObserverKult
Lexo edhe:
Luljeta Lleshanaku: Pesë vite jetë për një dështim në dashuri
Edhe kësaj vere po i vjen fundi.
Nuk e kam fjalën për pishinat e thara,
as erën që rrëmon për kërma si këlysh çakalli
mbi ranishtë…
E kam fjalën për një tjetër verë,
për të tjera shenja.
Poezinë e plotë e gjeni KETU
ObserverKult
Luljeta Lleshanaku flet për ‘Muzeun Virtual për Kampet e Punës në Maliq’
Luljeta Lleshanaku rrëfen filmin dokumentar “Muzeu Virtual i Kampeve të Maliqit” me regji të Elton Baxhakut bazuar mbi tre rrëfimet origjinale të të mbijetuarve të këtyre kampeve. Sipas skenaristes, për këto kampe sot nuk ka më asnjë dokument apo projekt inxhinierik.
Tekstin e plotë e gjeni KETU
ObserverKult
