Dje në Bibliotekën Kombëtare “Pjetër Bogdani”, në Prishtinë, Shtëpia botuese Bard Books promovoi dhjetë libra të poeteshave shqiptare, të përfshira në kolanën “Safo”, kuratore e së cilës është Donika Dabishevci.
“Dashnisë së nji nate” e Donika Dabishevcit, “Vjeshta është grua” e Ilire Zajmit, “Femna s’asht njeri” e Ledia Dushit, “Ama ni lak” e Manjola Brahajt, “Mbrojtja e Hekubës” e Lindita Ahmetit, “Gabimi i shqisave” i Dije Demiri Frangut “Bima ime e kuqe” e Flora Brovinës, ” Guxo mos më duaj prap” e Rita Petros, ” Po të due unë” e Arjola Zadrimës dhe “Zoti më dashuron mua” e Sibel Halimit ishin librat e dhjetëshes së parë të kolanës Safo, për të cilat foli kuratorja Donika Dabishevci.
Dabishevci theksoi se renditja, e as botimi nuk ka karakter hierarkik.
“Bard Books do të vazhdoj kolanën duke sjellë edhe emra të tjerë të vlefshëm të diskursit femëror në letërsinë shqipe, po natyrisht duhej nisur nga diku…Konceptuar si njëlloj antologjie personale, secila prej librave përmban 50 poezi të t’botuara brenda periudhave t’ndryshme t’krijimtarisë së autoreve, por që brenda këtyre kopertinave funksionojnë si një lloj pasaporte identifikuese e përfaqësuese të tyre.”, theksoi Dabishevci.
Ajo tutje shtoi se secila nga këto poetesha ka profil e vend të veçantë në letërsinë shqipe, ndërsa falenderoi për kontributin Primo Shllakun, Agron Tufën, Osman Gashin, Halil Matoshin, Emin Eminin, Luan Topçiun, Zija Vukajn, Sherif Luzhën, Besnik Jahën, Ag Apollonin të cilët kanë kontribuar me parathënie për librat e botuara.
“Po ashtu secili nga këta libra shoqërohet edhe me nga një paratekst kritik, që paralajmëron dhe analizon diskurset e tyre poetike, vargjet e veçanta e t’pangatërrueshme me të tjerat”, shtoi Dabishevci, duke prezentuar secilin nga librat me radhë.
Tutje u lexuan poezi nga autoret e librave dhe po ashtu pati diskutim për librat dhe autoret.
ObserverKult
