Nga Namir Lapardhaja
Modelet që ofron sot bota e shoubizit, tallavasë, hip-popit, tik-tokut apo, në përgjithësi, rrjeteve sociale, janë kontributi më i dëmshëm që mund t’i bëhet artit dhe kulturës, ashtu siç janë, njëkohësisht, një kambanë alarmi për të ardhmen e rinisë shqiptare.
Mbështetja dhe promovimi i këtyre figurave nga media, politika apo, më keq, institucionet fetare dhe arsimore, nxjerrin në pah rendin e përmbysur të vlerave në shoqërinë tonë, duke treguar mungesë vullneti dhe dëshire për promovim të së mirës, së bukurës, së virtytshmes dhe së dobishmes në shoqëri.
Figura të tilla që nuk përçojnë asgjë përveçse injorancë dhe mungesë kulture, varfëri shpirtërore, gjuhë konfliktuale dhe rrugaçërore, janë një model i dëmshëm për adoleshentët dhe janë një inspirim për një kulturë rruge të dhunshme, e cila shkon në të kundërtën e asaj që mundohet të mësojë familja, shkolla apo institucionet e karakterit social apo religjoz.
Një shoqëri që ka humbur orientimin dhe vlerësimin e hierarkisë së vlerave, është e destinuar të mbytet në llumin që vetë ka gatuar, ndaj mos të çuditet kur në të ardhmen e afërt, ashtu si edhe sot, të përballet me dështimin e shkollës, me shpërbërjen e familjes, me përmbysjen e çdolloj vlere të nevojshme për një jetë normale.
Refuzimi i këtyre modeleve nga media, politika, institucionet arsimore dhe të tjerë, do të ishte një kontribut i vlefshëm për rininë dhe familjen shqiptare. Ato nuk mund të përjashtohen me forcën e dhunës apo me shkop magjik, mirëpo nuk duhen paraqitur si vlera të padiskutueshme, por si ‘aksidente’ sociale dhe kulturore, duke u bërë pjesë e debateve dhe kritikave të shëndosha nga ekspertë të artit, kulturës, sociologjisë, fesë etj.
Vetëm një qasje kritike ndaj gjithçkaje të dëmshme që na ofrohet, do të ishte zgjidhja më e mirë për një rini të orientuar nga vlerat.
ObserverKult
Lexo edhe:
NAMIR LAPARDHAJA: “DON KISHOTI”, (RI)LEXIM I NJË LETËRSIE TË MADHE
