Anekdotë popullore
Në një kuvend të burrave, hyri me pak vonesë edhe Shaban Hoxha. Ishte vonuar pak dhe, natyrisht, plakun e mençur e pret kuvendi.
Mirëpo, një mendjemadh i atij fshati, me mustaqe të holla si bishti i miut, që ja kishte mbushur mendjen vetes se e ka vendin në kuvend të burrave, i hidhëruar pse kuvendi po e respektonte Shabanin, mezi priste që t’ia thoshte ndonjë fjalë.
Shaban Hoxha u rahatue në kullë. Ia sollën edhe kafen.
Njëri prej pleqve në kuvend tha:
– Fol diçka Shaban Hoxha!
Ende pa e çelur gojën Shabani, ai mendjemadhi ia priti:
– Çka ka me fol Shaban plehu që vonohet në kuvend të burrave?
Të gjithë u prekën. Ai plaku që i tha Shabanit më parë “fol diçka”, u zu ngushtë, por foli:
– Mos u hidhëro lum Shabani, se është martue rishtas dhe e ka pak veten n’qejf?
– Jo – tha Shabani Hoxha, – nuk hidhërohem. Plehut ia sheh hajrin dikush, se plehu e rrit bimën, e mendjes së madhe, pasha zotin, kush mbi dhe hajrin deri sot s’ia ka pa!
ObserverKult
Lexo edhe:
Anekdotë popullore: Zor me u pasuru e lehtë me u fik’
Popullore: Njeriu i keq nuk i bën dëm veç vetit, por krejt miletit!
