Objekti i ish-restorantit “Beni Dona” në Podujevë do të përshtatet dhe hapësirat e tij do të shfrytëzohen për galeri të artit, me qëllim që të plotësohen kërkesat dhe nevojat e artistëve llapjanë.
Drejtoresha e Kulturës, Rinisë dhe Sportit (DKRS), Elhame Kutllovci, ka vizituar hapësirat e “Beni Dona”-s për t’u njoftuar nga afër me mundësitë që ofron ky objekt me hapësirat rreth tij dhe për t’i shikuar mundësitë që ato të përshtaten dhe të përdoren për funksionalizimin e galerisë së artit.
Me këtë rast, drejtoresha Kutllovci ka thënë se me projektin që do ta hartojnë, ky objekt do të transformohet dhe në këto hapësira do të krijohen kushte të mira për artistët e artit pamor, transmeton ‘epokaere’.
“Bazuar në mundësitë buxhetore, me realizimin e fazës së parë të këtij projekti do të fillojë këtë vit. Kjo do të bëhet me qëllim të përmbushjes së kërkesave dhe nevojave të artistëve të artit pamor të cilët edhe sot e kësaj dite nuk kanë hapësira të destinuara për zhvillimin e punës dhe aktiviteteve të tyre”, ka thënë Kutllovci.
Për shkak se DKRS-ja nuk ka buxhet të mjaftueshëm për realizimin e plotë të këtij projekti, drejtoresha Kutllovci ka thënë se përkrahje do të kërkohet edhe nga Ministria e Kulturës, Rinisë dhe Sportit (MKRS).
